«Փոխանցում Աստծուց». Հենրիխ Մխիթարյանի պատմական լուսանկարները. Մաս 1

Եթե մեկ տարի առաջ ամբողջ համացանցում խոսում էին հայազգի կիսապաշտպան Հենրիխ Մխիթարյանի փայլուն ելույթների մասին «Մանչեսթեր Յունայթեդում», ապա հիմա բոլորն անհամբեր սպասում են, թե ո՞ր ակումբ կտեղափոխվի Մխիթարյանը: Տարբերակներն ու առաջարկները շատ են, ու պետք է սպասել, թե ի՞նչ ընտրություն կկատարի հայ ֆուտբոլիստը:

NEWSPRESS.am Sport-ը սկսում է շարք, որտեղ կներկայացնի Հենրիխ Մխիթարյանի պատմական ու արժեքավոր լուսանկարները: Այս անգամ ներկայացնում ենք 3 լուսանկար, որոնք պատմական են, արժեքավոր կարևոր ու հիշարժան:

Յուրի Ջորկայեֆն ու փոքրիկ Հենոն

Ֆրանսիայի հավաքականի նախկին ֆուտբոլիստ, աշխահի ու Եվրոպայի չեմպիոն Յուրի Ջորկայեֆը բազմիցս խոսել է Հենրիխ Մխիթարյանի մասին: Երբ «Մանչեսթեր Յունայթեդը» նվաճեց Եվրոպա լիգայի գավաթը, այդ ժամանակ Յուրին համացանցում կատարեց այս գրառումն ու հրապարակեց վերոնշյալ լուսանկարը.

«Այդ օրն ինձ ասացիր, որ մի օր դու էլ կնվաճես Գավաթը: Դու արժանի ես սրան, ընկերս: Շնորհավորում եմ: Բրավո Մխիթարյան»:

Մխիթարյանի արձագանքը չուշացավ, ու հայ ֆուտբոլիստը պատասխանեց Ջորկայեֆին.

«Անչափ շնորհակալ եմ, Յուրի Ջորկաեֆ: Կարծես երեկ լիներ, երբ մենք լուսանկարվեցինք: Հիմա ես իրականացնում եմ նպատակներս այնպես, ինչպես որ դու»:

yuri jorkaef henrikh mkhitaryan

Յուրգեն Կլոպի ու Հենրիխ Մխիթարյանի գրկախառնությունը

«Լիվերպուլի» ներկայիս մարզիչ Յուրգեն Կլոպը, ով մի քանի մրցաշրջան աշխատել է Հենրիխ Մխիթարյանի հետ Դորտմունդի «Բորուսիայում» միշտ էլ նշել է, թե ինչքան է հիացած հայ ֆուտբոլիստով: Դորտմունդում աշխատելու տարիներին Կլոպը բացահայտեց Մխիթարյանի լավագույն որակները, ու արդյունքում Հենոն իր ամենաֆանտաստիկ տարիներն անցկացրեց հենց «Բորուսիայում»:

Հայտնի փաստ է, որ իր թիմի հաղթանակներից հետո Կլոպը միշտ մոտենում է ու հերթականությամբ շնորհակալություն հայտնում ֆուտբոլիստներին: Լուսանկարում Յուրգեն Կլոպի ու Մխիթարյանի ամենաջերմ գրկախառնությունն է, որտեղ գերմանացի մասնագետը ցույց է տալիս, թե ինչքան է սիրում ու հարգում հայ ֆուտբոլիստին:

yurgen klop henrikh mkhitayan

«Աստծու փոխանցումն» ու գեղեցիկ գոլը

2016 թվականի տարեվերջին անգլիական «Սանդերլենդի» դեմ խաղում Մխիթարյանը փոխարինման դուրս եկավ: Խաղի 86-րդ րոպեին Զլատան Իբրահիմովիչի փոխանցումից հետո հայ կիսապաշտպանը գնդակը «կարիճի հարվածով» ուղարկեց հակառակորդի դարպասը: Մխիթարյանը դարձավ շատ գեղեցիկ գոլի հեղինակ, որից հետո «Մանչեսթերի» երկրպագուներն սկսեցին պաստառներ պատրաստել, որոնց վրա պատկերված էր գոլի դրվագը: Մխիթարյանի գոլը դարձավ «Մանչեսթեր Յունայթեդի» 2016/17թթ. մրցաշրջանի գոլը, իսկ մրցանակաբաշխության ժամանակ Մխիթարյանն ընդգծել էր, որ չէր կարող պատկերացնել, որ այդպիսի գոլի հեղինակ կդառնա.

«Իսկապես չգիտեի, թե ինչ է կատարվում: Չեմ կարծում, թե պետք է մարզվես, որ նման գոլերի հեղինակ դառնաս, պարզապես պետք է կայացնես այդ արագ որոշումը: Ես չէի կարող վրիպել, քանի որ փոխանցում էի ստացել Աստծուց»: