Ավստրալիայում մեքենան մխրճվել է մարդկանց մեջ. կա 14 տուժած

Ավստրալիայի Մելբուրն քաղաքում մեքենան մխրճվել է անցորդների մեջ: Հարձակման հետևանքով 14 մարդ էտուժել, որոնցից մի քանիսի վիճակը գնահատվում է ծայրահեղ ծանր: Երկու հոգի արդեն ձերբակալված է, այդ թվում և մեքենայի վարորդը: Մելբուրնի ոստիկանապետ Ռասսել Բարետը հայտարարել է, որ վրաերթը դիտմամբ է կատարվել, սակայն դեռ հայտնի չեն դրդապատճառները: Ինչպես պատմում են ականատեսները, մեքենան, 70 կիլոմետր արագությամբ մխրճվել է փողոցի բանուկ հատվածում գտնվող մարդկանց ամբոխի մեջ, այդ հատվածում մոտ հիսուն մարդ է եղել:

Մեքենան վրաերթի է ենթարկել ճանապարհին հայտնված մարդկանց և նույնիսկ չի էլ փորձել արգելակել: Հայտնվում է նաև, որ տուժածների մեջ մեկ մանկահասակ երեխա կա, ով գլխի շրջանում վիրավորում է ստացել և այժմ գտնվում է հիվանդանոցում: Ավստրալիայի ընդդիմադիր ուժերի ղեկավար Բիլ Շորտեն Twitter-ի իր էջում իր ցավակցությունն է հայտնել «ահավոր պատահարի» հետ կապված և նշել, որ տեղի ոստիկանությունն ու շտապօգնությունը մեծ աշխատանք են տարել:

Տեղի ունեցածը նման է նախկինում Ամերիկայի միացյալ նահանգներում և եվրոպական մի շարք երկրներում տեղի ունեցած ահաբեկչական հարձակումներին, սակայն ոստիկանությունից տեղեկացնում են, որ քննությունը նոր է սկսվել և դեռ վաղ է որևէ կարծիք հայտնել տեղի ունեցածի վերաբերյալ:

Հիշեցնենք, որ այս տարվա փետրվարին կրկին Մելբուրնում մեքենան վրաերթի ենթարկեց վեց անցորդի, սակայն այդ ժամանակ տեղի ունեցածը չորակվեց որպես ահաբեկչություն: