Նոր տարվա նախաշեմին «նվեր» արվեց. «Աջ ղեկ» նախաձեռնության անդամների հանդիպումը նախարարի հետ խոստումնալից չէր

«Աջ ղեկ» նախաձեռնության անդամները հանդիպեցին ՀՀ տրանսպորտի, կապի և տեղեկատվական տեխնոլոգիաների նախարարի հետ: Վերջիններս ներկայացնելով խնդիրը նշեցին, որ նախագիծը պետք է վերանայվի, քանի որ սա առաջին հերթին սոցիալական խնդիր է:

«Ինչո՞ւ սոցիալական. Հայաստանում աջ ղեկ ունեցող մեքենաները բավականին շատ են, և «Աջ ղեկ» նախագծի հաստատումից հետո շատ մարդիկ իրենց մեքենաների ձեռքից կրակն են ընկնելու»,- նշեց նախաձեռնության անդամներից Արթուրը:

Նախագծի հիմքում դրված երկու հիմնավորումներն էլ սխալ են և հիմք չեն կարող հանդիսանալ՝ նախագիծի օրենքի ուժ ստանալու համար: Վարորդները չեն կիսում այն տեսակետը, թե աջակողմյան ղեկով մեքենաների երթևեկությունն ավելի վտանգավոր է:

«Բացի այս տրանսպորտի երթևեկության որակը բարձրացնելու համար, սա ամենաառաջնայի՞ն խնդիրն է: Ճանապարհային անվտանգության խնդիրը բարձրացնելու և լուծելու համար ուրիշ կարևոր առաջարկ չկա՞»,– իր հարցով նախարարին դիմեց վարորդներից Վահան Հովսեփյանը:

Նրա խոսքով, գույքի օտարման խնդիրը հակասահմանադրական է, ցանկացած քաղաքացի իրավունք ունի օտարել իր գույքը՝ վաճառել, և եթե իրենք ցանկանում է վաճառել աջ ղեկով իր մեքենան, պետությունը չի կարող արգելել:

«Կարծում եմ, որ այսպիսի լուրջ փոփոխություններ ենթադրող ակտը պետք է լուրջ հիմնավորումներ ունենա, կատարվեն հետազոտություններ: Ինչո՞ւ ենք մենք վերցնում Ղազախստանի ու Բելառուսի օրինակը: Ինչո՞ւ չենք նայում, օրինակ, Ռուսաստանին, որը չի արգելել»,-նկատեց նա:

Ի պատասխան՝ Վահան Մարտիրոսյանն արձագանքեց, թե դա անձնական գնահատական է, որ խնդիրն արդիական չէ:

«Ձախ ղեկի վարորդը կարող է ասել՝ արդիական է, աջը կարող է ասել՝ ոչ: Ամեն մեկն իր կարծիքն ունի»,-ասաց նախարարը:

«Լոգոս» ՀԿ նախագահ Արա Մելիքջանյանն էլ նշեց. «Նոր տարվա նախաշեմին ձեր կողմից «նվեր» արվեց, որ եկեք ամանորից հետո դարդը լացեք, թե ինչ կլինի, էլ չեք կարող ծախել, բայց որոշ ժամանակ կթողեք քշենք»,-ասաց նա: