Աղբի տեղն աղբամանում է, սակայն աղբամանի բացակայության դեպքում Երևանի կենտրոնում աղբակույտեր ի հայտ կգան (ֆոտո)

«Մաքուր Հայաստան» պետական ծրագիրը մեկնարկել է 2017թ. ապրիլից՝ ՀՀ վարչապետ Կարեն Կարապետյանի հանձնարարականով: Այս ամենին հաջորդեց ՀՀ տարածքային կառավարման և զարգացման նախարարությունում՝ ՀՀ ՏԿԶ նախարարի առաջին տեղակալ Վաչե Տերտերյանի գլխավորությամբ ձևավորված «Մաքուր Հայաստան» միջգերատեսչական հանձնաժողովը: ՀՀ ՏԿԶ նախարար Դավիթ Լոքյանի անմիջական վերահսկողությամբ հանձնաժողովը կազմակերպել է երեք համապետական շաբաթօրյակ: 2017 թ. հոկտեմբերի 21-ի դրությամբ 2033 աղբանոցից մաքրվել կամ կոնսերվացվել է 1587-ը, փակման ենթակա է 163 աղբանոց, այս պահին շահագործվում է 298-ը:

Արդեն մայիս ամսին վարչապետ Կարեն Կարապետյանը ՀՀ կառավարության հերթական նիստի ժամանակ իր ելույթում նշեց.

«Մենք համայնքներին առաջարկում ենք, որպեսզի ներդնեն սանիտարական տեսուչների ինստիտուտ: Այն պետք է հստակ խաղի կանոններ, նորմեր սահմանի: Այդ կառույցի բյուջեի աղբյուրները տուգանքներից են գոյանալու, որի մի մասը ուղղվելու է տեսուչների վարձատրմանը, մյուս մասը՝ աղբահանության և սանիտարական մաքրման գործառույթների իրականացմանը»:

Նոյեմբեր ամսից սկսած «Մաքուր Հայաստան» ծրագիրը նոր փուլ մտավ և մեկնարկեց «Աղբի տեղն աղբամանում է» խորագրով համապետական սոցիալական արշավը։ Բջջային հավելվածի միջոցով հնարավոր է տեսնել աղբի կամ աղբավայրի, աղբաշատ վայրի պատկերը` առաջարկելով լուծման տարբերակ։ Համակարգը նաև պետության և քաղաքացիների միջև սերտ համագործակցության օրինակ է` բաց ու թափանցիկ մեխանիզմի միջոցով։

Այս ամենի հետ մեկտեղ Երևանի կանգառներում, փողոցներում, գովազդային վահանակների վրա սկսեցին փակցվել «Աղբի տեղն աղբամանում է» խորագիրը կրող պաստառներ: Ստացվում է, որ 2017 թվականի ընթացքում Հայաստանում ու մասնավորապես Երևան քաղաքում մեծ աշխատանքներ տարվեցին՝ կապված աղբի հետ:

Սակայն այս դրական նախագծերի հետ մեկտեղ պետք է նշել նաև, որ շատ հաճախ աղբի կուտակման ու աղբամանում չթափելու մեջ մեղադրվում է հենց հասարակությունը: Բայց շատ դեպքերում մարդիկ աղբը նետում են, քանի որ տարածքում աղբաման չկա: Նմանատիպ դեպքերում ճիշտ կլինի անդրադառնալ նաև այն խնդրին, որ աղբը պետք նետվի աղբամանում, սակայն երբ տարածքում աղբաման չկա, այդ դեպքում պետք է քայլեր ձեռնարկեն հենց «Մաքուր Հայաստան» պետական ծրագրի աշխատակիցները:

NEWSPRESS.am-ի տեսախցիկը ֆիքսել է Երևանի Կենտրոն վարչական շրջանի՝ մետրոյի Հանրապետության Հրապարակի տարածքում կուտակված աղբը: Հատկանշական է, որ աղբակույտերից 10-15 մետր հեռավորության վրա՝ այգում, կան աղբամաններ, որտեղ չկան աղբակույտեր: Փաստացի ստացվում է, որ հասարակությունն աղբը թափում է աղբամանում, իսկ աղբամանի բացակայության դեպքում՝ գետնին:

Այսպիսի դեպքերին պիտի ուշադրություն դարձնեն Երևանի քաղաքապետարանն ու «Մաքուր Հայաստան» պետական ծրագրի աշխատակիցները: Իր մեղքի բաժինն ունի նաև հասարակությունը: Նմանատիպ շղթայական խնդրին պետք է տալ համապատասխան լուծում, հակառակ դեպքում Երևանի կենտրոնը, ծայրամասերն ու ամբողջ Հայաստանի տարածքը կվերածվի աղբակույտի: