Ինչ վաճառվում է, անվտանգ է. ՍԱՊԾ պետի հայտարարություն հայտարարությանց

Հայաստանի սննդամթերքի շուկան անվստահելի է, հաճախ են կրկնում սննդի ոլորտում աշխատող փորձագետները, և դա մեծամասամբ պայմանավորված է ստուգումների ցածր մակարդակով: Ոլորտի պատասխանատու՝ Սննդի անվտանգության պետական ծառայությունը սննդի ստուգումը չի վստահում մասնավոր լաբորատորիաներին, իսկ մասնավորները՝ պետական լաբորատորիաներին:

«Եթե որևիցե բան վաճառվում է և հակառակ բանը չի ապացուցվել, հետևապես ինքն անվտանգ է»,- նախօրեին ասել է Սննդի անվտանգության պետական ծառայության պետ Իշխան Կարապետյանը:

Վերջինս ավարտել է Երևանի ճարտարապետության և շինարարության պետական համալսարանի ձեռնարկությունների էկոնոմիկա և կառավարում ֆակուլտետը, ճարտարագետ-տնտեսագետի որակավորում է ստացել: ՍԱՊԾ է տեղափոխվել «Գազպրոմ-Արմենիայից»: Կարճ ասած՝ նա մասնագետ չէ և նրա հայտարարությունը, թե ինչ վաճառվում է, հետևաբար անվտանգ է, պարզ ապացույց է, որ սննդի անվտանգություն ասվածը նրա համար վերերկրային կատեգորիա է: Ինչևէ:

Այս տարի արդեն շուկաներում վաճառվել է ձիու և ավանակի միս, թռչնամսի մեջ հայտնաբերվել են զանազան հակաբիոտիկներ, սալմոնելա և այլն, որոնք վտանգավոր են սննդում օգտագործման համար և դեռ հայտնի չէ, թե ի՞նչ որակի սնունդ է վաճառվում իրացման կետերում, եթե կանոնավոր ուսումնասիրություններ չեն կատարվում:

Սակայն միանշանակ աչք փակել և հայտարարել, որ ինչ վաճառվում է, անվտանգ է, ուղղակի հետաքրքիր մոտեցում է: Իսկ ի՞նչ է նա պատասխանելու ավանակի և ձիու միս գնողներին, թե՝ ազնիվ խոսք, անվտա՞նգ է, քանի որ վաճառվում է: Սա էլ այսպես:

Ամանորը մոտենում է, և ժամկետնանց, ոչ առողջ, կասկածելի սնունդ վաճառողների պակաս չկա, իսկ ՍԱՊԾ պետի հայտարարությունը պարզապես կանաչ լույս է ամեն տեսակ սննդամթերք իրացնողների համար:
Հաճախ է հայտարարվում, որ յուրաքանչյուրն իր տեղում լինի՝ յուրաքանչյուր աշխատանք որակյալ և նպատակաուղղված կլինի, իսկ այս դեպքում ո՞ւր կարելի է տանել Իշխան Կարապետյանին, որ նա իր տեղում լինի, դժվար հարց է, եթե նկատի ունենանք նրա մոտեցումները:

Երևի թե պետք է խոշոր եղջերավոր կենդանու մսի փոխարեն ավանակի և ձիու միս մատուցել Իշխան Կարապետյանին և հարցնել նրա կարծիքը խաբված լինելու և վստահության բացակայության մասին:

NEWSPRESS.am