Քուանշ Ուրիխանյանին

Այսօր «Ծառուկյան» դաշինքի մամուլի խոսնակ, ԱԺ-ում նույն խմբակցության պատգամավոր Տիգրան Ուրիխանյանը հանդիպել է լրագրողների հետ և երկար-բարակ ճառ ասել: Պատգամավորի ամբողջ խոսքից, սակայն, կարելի է առանձնացնել մեկ միտք, այն վերածել սեպագիր արձանագրության և պահպանել նախագահական նստավայրի դիմաց՝ մի բանուկ հատվածում, որպեսզի անցորդ-քաղաքացիներն այդ խորհրդանշական վայրում միշտ տեսնեն արձանագրությունը և հիշեն Տիգրան Ուրիխանյանի խոսքը.

«Որևէ պաշտոնի համար «Ծառուկյան» դաշինքը չի գնալու կոալիցիայի, ինչպես չի գնացել ոչ մի ժամանակ»:

Քուանշ:

Այս նախադասությունը պետք է այնքան տիրաժավորել, որպեսզի այդ քաղաքական թիմը, այսպես ասած, «թասիբի ընկնի» և տեր կանգնի իր ասած խոսքերին, բայց հակված ենք այն տեսակետին, որ 2018 թվականի ապրիլին քաղաքական իրավիճակ է փոխվելու: Վերը նշված թիմի անդամներից ոմանք, ամեն դեպքում, կհայտնվեն կառավարական օղակներում և գործնականում հնարավորություն կունենան իրագործելու իրենց ծրագրային դրույթները: Այստեղ ահա առիթ կունենանք հիշեցնելու, որ Հայաստանը Դուբայի վերածելու խոստում էին տվել:

Դե մենք Դուբայում չենք եղել, կարծում ենք, որ հարուստ երկիր լինելու համար էլ շատ կարևոր է ծով ու նավթ ունենալը, իսկ առանց այդ ամենի դժվար է թե՛ Սինգապուր դառնալը, թե՛ Դուբայ, բայց, եթե հիշում եք, դաշինքի առաջնորդը նախընտրական փուլում անընդհատ սարկազմիկ մոտեցմամբ հարց էր բարձրացնում, թե ի՞նչ ունի Դուբայը, ընդամենը ծով ու նավթ, բայց տեսեք՝ ինչերի է հասել, մենք էլ կհասնենք:
Դուբայի հարստությանը հասնելու համար, ըստ նրա, պետք էր ընդամենն իրականացնել իրենց առաջարկած ծրագրային դրույթները:

Հիմա էլ Տիգրան Ուրիխանյանն ասուլիս է տալիս ու ասում, թե չեն խուսափում կառավարման պատասխանատվությունը ստանձնելուց, բայց ավաղ ժողովուրդն ուրիշին է ձայնը տվել:

Ինչպես վերևում նկատեցինք, քաղաքական իրավիճակն ամեն դեպքում փոխվելու է, կոալիցիան էլ կամ ոչ այս բառով, բայց նույնաբովանդակ համագործակցությունն էլ ակնկալվում է, այստեղ պետք է հիշել Ուրիխանյանի հաջորդ միտքը՝ կառավարման պատասխանատվությունը ստանձնելու հետ կապված, հետևաբար նաև պետք է սպասենք Հայաստանը Դուբայի վերածելու ծրագրի իրականացմանը: Ամեն բան պատրաստ է:

NEWSPRESS.am