Աջ ղեկով մեքենաների արգելքը հակասահմանադրական է, կդիմեմ ՄԻԵԴ. կին վարորդ

Հայաստանում 2018թ. ապրիլից աջ ղեկով մեքենաների ներմուծումը կարգելվի, հետագայում նաև շահագործումը:

NEWSPRESS.am-ը խնդրի շուրջ զրուցեց աջ ղեկով ունեցող մեքենայի ավտովարորդ Լիա Խոջոյանի հետ:

-Ի՞նչ եք կարծում, ո՞րն է իրականում աջակողմյան ղեկով մեքենաների արգելքի բուն պատճառը:

-ԵԱՏՄ պայմանագրի մասին չմոռանալով՝ այդուհանդերձ կարծում եմ, որ պատճառն այստեղ բոլորովին այլ տեղ է թաքնված, որն էլ ստիպում է իշխանություններին ոտնահարել 30 հազարից ավելի քաղաքացու սահմանադրական իրավունքը: Վերջին տարիների ծանր սոցիալ-տնտեսական իրավիճակն ազդել է նաև քաղաքացիների գնողունակության վրա, և այսօր շատ քչերն են ունակ իրենց թույլ տալ գնել նոր մեքենա ավտոսրահներից:

Արդյունքում այդ սրահներում, որոնք պատկանում են մեր իշխանավորներին ու օլիգարխներին, «յուղը վրան» մեքենաները չեն կարողանում վաճառել անգամ ապառիկ տարբերակով, քանզի քչերը կարող են իրենց թույլ տալ մի քանի միլիոն դրամով մեքենա գնել: Այլընտրանք կար՝ Ճապոնիան՝ օգտագործված, աջ ղեկով մեքենաների երկիրը: Իրականում յուրաքանչյուր ոք ուզում է նոր ու շքեղ մեքենա վարել, բայց պայմաններից դրդված գնում է հինն ու օգտագործվածը:

Բացի այդ, այս արգելքը, որ ապրիլի 1-ից ուժի մեջ կմտնի, քանզի ես դրանում ոչ մի կասկած չունեմ, նոր եկամտաբեր բիզնեսի հնարավորություն է ստեղծում: Ասում են՝ այդ հնարավորությունից արդեն իսկ պատրաստվում է օգտվել Սամվել Ալեքսանյանը, ով այս պահին վերանորոգման վերջին շտրիխներն է իրականացնում 15 թաղամասի նախկին ավտոսերվիսում: Այնտեղ ծրագրում են իրականացնել նաև ղեկային համակարգի փոփոխության (վերասարքավորում) գործընթացը և հաշվի առնելով բիզնեսում օլիգարխ-պատգամավորի հնարավորությունները՝ համոզված եմ, որ այդտեղ այդ գործողությունը կիրականացվի ավելի մատչելի, քան քաղաքի այլ վայրերում: Ու կստացվի, որ պայմանական ասած այդ մենաշնորհը ևս կդառնա Ալեքսանյանինը՝ պարզ է, որ բոլորը կգերադասեն մատչելի գնով իրականացնել այն գործընթացը, առանց որի հետագայում չեն կարողանա վաճառել մեքենան կամ վերահաշվառել այն: Այնպես որ ԵԱՏՄ-ի պայմանագրի դրույթի կյանքի կոչումը, իմ կարծիքով, ամենավերջին պատճառն է, որով պայմանավորված է իշխանությունների նման շտապողականությունը:

-Եվ արդյոք աջակողմյան վարորդների համար վարելը դժվա՞ր է Երևանում:

-Երևանում առհասարակ դժվար է վարել մեքենա, քանի որ տրաֆիկը շատ ծանրաբեռնված է՝ մեքենաները շատ են, փողոցները՝ նեղ: Բացի այդ էլ մեր վարորդները, մեղմ ասած, օրինապահ չեն և միշտ ինչ-որ տեղ շտապում են: Եվ մեղադրել այս ամենում աջ ղեկով մեքենաներին, ուղղակի անհասկանալի է:

Անհասկանալի է նաև, թե ինչու պետք է քաղաքացին, որը ժամանակին օրենքով ներմուծել է Հայաստան այդպիսի մեքենա, այժմ իր գրպանից վճարի այն վերասարքավորելու համար: Ի վերջո, խոսքը 10, 100 կամ 1000 քաղաքացու մասին չէ, այլ 30 հազարից ավելի քաղաքացիների մասին, որոնք կանգնում են նվազագույնը 500 դոլար ծախսի առաջ: Իսկ պետությունը որևէ կերպ չի պատրաստվում փոխհատուցել նրանց, թեև, հիշեցնեմ, մենք բոլորս մեքենան թե՛ ներմուծելիս, թե՛ շահագործելիս պետական բոլոր տուրքերը վճարել ենք: Այդ դեպքում՝ ինչո՞ւ հիմա պետությունը չի ուզում որևէ կերպ ձեռք մեկնել ու փոխհատուցել, թեկուզ մասամբ, այդ ծախսը:

Օրենքի նախագիծը շատ թերի է, հակասահմանադրական ու մարդու իրավունքները ոտնահարող, այնպես որ եթե այն ընդունվի և սահմանափակվի իմ սեփական գույքի տնօրինման իրավունքը, ապա ես ևս պատրաստ եմ դիմել դատական բոլոր ատյաններ՝ ընդհուպ ՄԻԵԴ: