Գալուստ Սահակյանն իր սև փիառով արջի ծառայություն է մատուցում. քաղտեխնոլոգ

«Հնարավոր չէ 100 տոկոսով ասել, որ Սերժ Սարգսյանն է լինելու վարչապետ, բայց ամենահավանական տարբերակը հենց դա է»։

Լրագրողների հետ զրույցում իր տեսակետը հայտնեց քաղաքագետ Էդգար Վարդանյանը։

Նրա դիտարկմամբ՝ համակարգն ինքնին ինչ-որ տեղ այլընտրանք չի թողնում այն մարդուն, որն ավարտում է իր պաշտոնավարումը և պետք է իր ռեսուրսները պահպանելու տարբերակ գտնի։

«Այժմ ականատես ենք լինում Սերժ Սարգսյանին վարչապետ դարձնելու քարոզարշավին, և հիմնական մեխն այն է, որ Սերժ Սարգսյանն ինքը չի առաջարկում իր թեկնածությունը, այլ խնդրում են, որ նա ստանձնի այդ պատասխանատու պաշտոնը, և ինքն էլ ստիպված ընդառաջում է»:

Քաղտեխնոլոգ Վիգեն Հակոբյանն էլ չի բացառում, որ Սերժ Սարգսյանը կփորձի լինել իրոք իշխանության տերը, բայց Մելիք Ադամյանում նստած՝ ՀՀԿ նախագահի կարգավիճակում:

«Վերջին երկու տարիների ընթացքում Սերժ Սարգսյանի գլխավոր գլխացավանքն այն է, որ բալանսավորված համակարգ ձևավորի, որ կարողանա կառավարել նաև այն դեպքում, եթե իրավիճակն այնպիսին է, որ անպայման չէ՝ ինքը վարչապետ լինի»,-նկատեց քաղտեխնոլոգը։

Ինչ վերաբերում է Սերժ Սարգսյանի վարչապետ դառնալու մասին Հանրապետականների հայտարարություններին, ապա Վիգեն Հակոբյանը նկատեց, որ Կարեն Կարապետյանի հայտարարություններն առանց շեֆի համաձայնության, չեն լինի։ Համենայնդեպս, ըստ նրա, այդպես են համոզված նաև իրենք՝ հանրապետականները։ Մեկ այլ բան է Գալուստ Սահակյանի հայտարարությունը, որը, քաղտեխնոլոգի որակմամբ, սև փիառ է։

«Կարծում եմ՝ Գալուստ Սահակյանն արջի ծառայություն է մատուցում, քանի որ ցանկացած դեպքում նրա ասածը սև փիառ է: Եթե Գալուստ Սահակյանը «Մերսեդես» էլ քարոզի, «Մերսեդեսի» վաճառքները կարող են նվազել: Խառնաշփոթը հենց նրանում է, որ բոլոր այդ հայտարարությունները որպես ակնարկ են ընկալվում»,-ասաց նա։