2018-ին ծնելիության մակարդակը 7-8 տոկոսով կնվազի. Ռուբեն Եգանյան

ԵԱՏՄ անդամակցության հետևանքով ավելացել են Հայաստանից միգրացիոն հոսքերը դեպի Ռուսաստան: Այս տարի տնային տնտեսությունների 35 տոկոսից ավելին ինչ-որ ձևով մասնակից է եղել միգրացիոն գործընթացներին: Այսօր լրագրողների հետ հանդիպմանը ասաց ժողովրդագիր Ռուբեն Եգանյանը:

Նա նաև հավելեց, որ միգրացիայի տնտեսական ներուժը շարունակում է նվազել, թեև Հայաստան մուտք գործող գումարներն աճում են. «Միգրացիան այլևս աղքատությունից խուսափելու միջոց չէ: Եթե նախկինում միգրացիան գոյատևման ռազմավարություն էր, այսօրվա դրությամբ այն վտանգներ է պարունակում»:

Ինչ վերաբերում է ծնելիությանը հաջորդ տարի, ապա, ըստ Ռուբեն Եգանյանի, գրանցվելու է ծնելիության ավելի ցածր մակարդակ և 7-8 տոկոսով ավելի քիչ երեխաներ են ծնվելու: Արձանագրվելու է մահացածների թվի աճ, ամուսնությունների թիվը նվազելու է:

Ըստ նրա՝ վերարտադրություն այժմ տեղի չի ունենում, ընդհակառակը՝ ընթանում է նեղացող վերարտադրություն: