«Նամակի վրա գրված է եղել՝ խիստ գաղտնի և դա հրապարակվել է՝ ցավում եմ»․ Հայրապետյանը՝ «պայմանավորված» խաղի մասին

ՀՖՖ նախագահի Ռուբեն Հայրապետյանը բացասաբար է վերաբերվում «Լոռի» – «Էրեբունի»՝ պայմանավորված լինելու մեջ կասկածվող խաղի մասին հրապարակմանը։ Նա լրագրողների հետ զրույցում նշեց, որ դրա գաղտնիությունը պետք է ապահովվեր։

Բայց քանի որ արդեն այդ մասին հայտարարվել է, ապա Հայրապետյանը որոշակի շտկումներ արեց։

«Ո՛չ թե Ռուբեն Հայրապետյանը, այլ Ֆուտբոլի ֆեդերացիան է դիմել ԱԱԾ նամակով։ Իսկ զուտ քննության գաղտնիությունից ելնելով՝ ես չեմ ուզում մեկնաբանել մանրամասները։ Հենց նամակի վրա գրված է եղել՝ խիստ գաղտնի և դա հրապարակվել է՝ ցավում եմ դրա համար»,- նշեց Հայրապետյանը։

Հիշեցնենք, որ օրերս տեղեկություն էր տարածվել առ այն, որ «Լոռի» – «Էրեբունի» (5:0) ֆուտբոլի Հայաստանի Առաջին խմբի հանդիպումը կասկածվում է պայմանավորված լինելու մեջ: Հանդիպման պայմանավորված լինելու վերաբերյալ զեկույց է կազմվել ՈւԵՖԱ-ի կողմից, իսկ ՀՖՖ-ն այդ առթիվ դիմել է ՀՀ քննչական կոմիտեի Լոռու մարզային քննչական վարչություն:

Դեպքի առթիվ 2017-ի դեկտեմբերի 15-ին ՀՀ ԿԱ ԱԱԾ քննչական վարչությունում հարուցվել է քրեական գործ՝ ՀՀ քրեական օրենսգրքի 201-րդ հոդվածի 1-ին եւ 3-րդ մասերով, որն ուղարկվել է ՀՀ քննչական կոմիտե նախաքննություն իրականացնելու նպատակով: Հունվարի 8-ին քրեական գործն ուղարկվել էր Լոռու մարզի քննչական վարչություն, որտեղ նույն օրն այն ընդունվել է վարույթ: