Ռոնալդուն «Ռեալում» իրեն խաբված է զգում և թիմակիցներին հայտնել է «Մանչեսթեր» տեղափոխվելու ցանկության մասին

Մադրիդի «Ռեալի» հարձակվող Կրիշտիանու Ռոնալդուն հստակ որոշում ունի ամռանը լքել ներկայիս ակումբը: Այդ մասին գրում է AS-ը:

Աղբյուրի տեղեկություններով՝ պորտուգալացի ֆուտբոլիստն այդ մասին հայտնել է իր մի քանի թիմակիցներին: Ռոնալդուի համար առաջնայինը կլիներ կարիերայի շարունակությունը «Մանչեսթեր Յունայթեդում», որտեղից և 2009 թվականին նա տեղափոխվել «Արքայական ակումբ»: Անգլիական գրանդ ակումբում, որտեղ նա վաստակել է իր առաջին «Ոսկե գնդակը», արդեն տեղյակ են Ռոնալդուի ցանկության մասին:

Ֆուտբոլիստի դիրքորոշումը պայմանավորված է այն բանով, որ նա իրեն լիովին խաբված է զգում «Ռեալի» ղեկավարության կողմից: Ակումբի նախագահ Ֆլորենտինո Պերեսը գարնանը խոստացել էր բարելավել պայմանագրի ֆինանսական մասը, բայց դա այդպես էլ տեղի չունեցավ:

Ավելի վաղ հաղորդվում էր, որ Ռոնալդուն դժգոհ է այն բանից, որ ավելի քիչ է վաստակում, քան որոշ այլ ֆուտբոլիստներ: Պորտուգալիայի ազգային հավաքականի ֆուտբոլիստը տարեկան 21 միլիոն  եվրո է վաստակում և ամենաբարձր վարձատրվող ֆուտբոլիստների շարքում զբաղեցնում է 5-րդ տեղը: Օրինակ՝ «Բարսելոնայի» հարձակվող Լիոնել Մեսսին տարեկան վաստակում է 50 միլիոն, իսկ «ՊՍԺ»-ի հարձակվող Նեյմարի տարեկան աշխատավարձը 36 միլիոն եվրո է:

Հիշեցնենք, որ Ռոնալդուի պայմանագիրը «Ռեալի» հետ ուժի մեջ է մինչև 2021 թվականի ամառ: