«Ծառուկյան» դաշինքից հերքում են. Գագիկ Ծառուկյանի ծրագրերի մեջ նախագահի թեկնածության հարց դրված չէ

Մամուլում շրջանառվող որոշ լուրերի համաձայն՝ «Ծառուկյան» դաշինքի նախագահ Գագիկ Ծառուկյանն իբր ցանկանում է առաջադրվել որպես նախագահի թեկնածու։ NEWSPRESS.am-ն այս հարցին ևս անդրադարձել էր․ ըստ որոշ աղբյուրների՝ Գագիկ Ծառուկյանն իբր այս հարցի շուրջ հանդիպել ու զրուցել է նաև երկրի նախագահի հետ, ով իբր չի ողջունել Ծառուկյանի այս միտքը։

Թե որքանով են այս լուրերը համապատասխանում իրականությանը, NEWSPRESS.am-ը փորձեց ճշտել «Ծառուկյան» դաշինքից, ի պատասխան որի դաշինքից ասացին, որ նման բան չկա և այս տեղեկատվությունը բոլորովին իրականությանը չի համապատասխանում։

«Այն ամենն ինչ-որ ներկայացվել է սուտ է՝ սկզբից մինչև վերջ։ Նախ սկսենք նրանից, որ Գագիկ Ծառուկյանը երբեք էլ չի ասել, որ ինքը ցանկանում է դառնալ նախագահ և նա չի հավակնում նախագահի պաշտոնին։ Փոխարենը պարոն Ծառուկյանը միշտ հայտարարել է, որ կլինի ժողովրդի կողքին ու կսատարի այն ուժերին, ովքեր կփորձեն բարեկեցիկ կյանք ապահովել ժողովրդի համար, և հնարավորինս կնպաստեն երկրի բարգավաճմանն ու առողջացմանը։ Տրամաբանական է, որ այս համատեքստում հանդիպումներ Սամվել Կարապետյանի կամ որևէ ուրիշ մեկի հետ ևս չի եղել, քանի որ, ինչպես նշեցինք, Գագիկ Ծառուկյանի ծրագրերի մեջ նախագահի թեկնածության հարց դրված չի եղել և չի լինելու»,- ասացին դաշինքից։

Հայցում ենք ձեր ներողամտությունը՝ ոչ ճիշտ տեղեկատվության հիման վրա, մինչ այս կատարած հրապարակման համար։