Բոլորը խոսում են, իսկ Հենրիխը՝ լռում. պայթյո՞ւն մեծ լռությունից առաջ, թե՞…

Հենրիխ Մխիթարյանի շուրջ ստեղծված իրավիճակը շարունակում է պահպանել իր անորոշությունը: Հետաքրքիրն այն է, որ բոլորը խոսում են, գրում, հայտարարում Մխիթարյանի ապագայի մասին լուրեր, սակայն ինքը՝ Հենրիխը, շարունակում է լռել: Հենրիխը միշտ էլ աչքի է ընկել իր համեստությամբ ու քչախոսությամբ, սակայն այս պահին ճիշտ ժամանակն է, որ նա խոսի: Հավանաբար տեղի է ունենալու տրանսֆեր, որի մասին լռում է հայ ֆուտբոլիստը, քանի որ տրանսֆերի կայանալու հետ մեկտեղ այդ մասին բոլորն էլ կիմանան:

Անգլիական սպորտային մամուլն ու պարբերականները շարունակում են մեկը մյուսի հետևից գրել լուրեր, որոնք իրարից տարբերվում են ու հակասում: Պարբերականների մի մասը նշում է, որ առաջիկա օրերին տեղի կունենա Հենրիխի տրանսֆերը դեպի «Արսենալ»: Մի շարք պարբերականներ Մխիթարյանին «պահում են» «Մանչեսթերում» մինչև հաջորդ մրցաշրջանի ավարտ:

Իտալական պարբերականները գրում են, որ «Ինտերն» ամեն ինչ անում է, որ ձեռք բերի Հենոյին: «Մանչեսթեր Յունայթեդի» թվիթերյան միկրոբլոգում սպորտային մեկնաբաններից մեկը գրել էր, որ չպետք է մոռանալ, որ Մխիթարյանի գործակալը Մինո Ռայոլան է, ով իր մարզիկին կգտնի լավ ու հարմար պայմաններ ունեցող թիմ:

Անգլիայի Պրեմիեր լիգայի 23-րդ տուրի՝ «Սթոք Սիթիի» դեմ հանդիպման հայտացուցակից Մոուրինյոն դուրս էր թողել հայ կիսապաշտպանին, իսկ հանդիպումից հետո Ժոզեն նշեց, որ Մխիթարյանի մոտ անորոշ վիճակ է և դա անդրադառնում է նրա հոգեբանական վիճակի և խաղի վրա:

Այս դրամատիկ տրանսֆերային պատմությանը միացած է նաև «Արսենալի» ֆուտբոլիստ Ալեքսիս Սանչեսը: Արդեն այսօր իտալացի հայտնի սպորտային լրագրող Ջանլուկա դի Մարցիոն հայտնեց, որ «Մանչեսթերն» ու Սանչեսը համաձայնության են եկել, սակայն գործարքը ձգձգվում է Մխիթարյանի տրանսֆերի պատճառով: Իսկ գերմանական սպորտային մամուլը գրում է, որ Օբամեյանգն ու Մխիթարյանը նորից կմիավորվեն, սակայն այս անգամ արդեն անգլիական ակումբում:

Ստացվում է այնպես, որ Մխիթարյանի, Օբամեյանգի, Սանչեսի ճակատագրերն իրար խաչված են, քանի որ սպորտայի մամուլը վերջին օրերին այս 3 ֆուտբոլիստներին կապում է իրար հետ: Տրանսֆերային պատուհանի փակմանը դեռ կա ժամանակ: Խոսեց Մոուրինյոն, խոսեցին բոլոր պարբերականները, խոսեցին հայ և անգլիացի երկրպագուները: Սակայն Մխիթարյանը դեռ լռում է: Միգուցե սա լռություն է մեծ պայթյունից առա՞ջ: Ապագան ցույց կտա….

NEWSPRESS.am sport