Շարմազանովը քրիստոնյա է դարձել

Պաշտպանության նախարար Վիգեն Սարգսյանի հայտնի գրառումից հետո կողմ և դեմ արտահայտվողների պակաս չկար, հետո պարզ դարձավ, որ նախարարի գրառման տակ հնարավոր չէ մեկնաբանություն գրել: Ինչևէ:

Դեռևս չեն մարել Վ. Սարգսյանի գրառման արձագանքները:

Փորձել են պարզել նաև ԱԺ փոխնախագահ Էդուարդ Շարմազանովի կարծիքը Պաշտպանության նախարար Վիգեն Սարգսյանի՝ 45 հազար դոլար դրամահավաք կազմակերպելու քայլի մասին, որին Շարմազանովը պատասխանել է քրիստոնեական հնազանդությամբ, այն է՝ միավորվեք, քրիստոնեաբար սիրեք զմիմյանս:

Ի դեպ, ՊՆ-ի դրամահավաքի վերաբերյալ իշխանական օղակներից գրառումներում միայն դրական վերաբերմունք է եղել, և որևէ պաշտոնյա չի հարցրել նախարարին, թե ինչո՞ւ հենց ՊՆ-ի միջոցներով չեք կազմակերպում ժամկետային զինծառայող Ալբերտ Դալաքյանի վիրահատությունը (թեկուզև բացառության կարգով), քանի որ ՊՆ-ն դրա համար միջոցներ արդեն ունի՝  դրամահավաքի ձևով հավաքագրված՝ 1000-ական դրամներ է հանգանակում:

Եթե իշխանական օղակներից որևէ մեկին պաշտպանել է պետք, սխալ է, թե ճիշտ է, ընդունելի տարբերակ է առաջարկածը, թե ոչ, բոլորը միահամուռ նետվում են պաշտպանելու իշխանավորականին: Մտայնությունն այն է, որ պետք է պաշտպանի իշխանավորականին՝ անկախ ամեն ինչից` սխալ է, թե ճիշտ է, արդար է, թե անարդար: Չէ՞ որ բումերանգը մի օրը յուրաքանչյուր իշխանավորականի դռանն է չոքելու:

Նույն դիրքերից է վեր ելել նաև Շարմազանովը. նա չի կարող հակառակվել, չի կարող կարծիք հայտնել, չի կարող այլընտրանք առաջարկել, մնացել է քրիստոնեական հեզությունը: Իհարկե, դժվար չէ քրիստոնեական հեզության վրա հույսը դնել, քանի որ Վիգեն Սարգսյանը, ի թիվս այլ աճպարարությունների, այս տարի հանրությանը զարմացրեց՝ մասնակցելով սուրբծննդյան արարողություններին՝ դառնալով Խաչքավոր:

Գուցե այլ երկրներում Պաշտպանության նախարարի նման քայլն այլ կերպ ընդունվեր, սակայն Հայաստանում, երբ հանրությունը սուր է նայում ամեն ինչին, այդ թվում՝ իշխանավորների քայլերին, Վիգեն Սարգսյանի խաչքավորությունը չընդունվեց քրիստոնեական սկզբունքներից ելնելով:

Պարզվում է՝ ոչ միայն Վ. Սարգսյանն է վերադարձել քրիստոնեության գիրկը, այլ նաև Շարմազանովը: Այսպես շարունակվելու պարագայում ՀՀԿ-ականներին սպառնում է համընդհանուր քրիստոնեություն, և, եթե ինչ, չմոռանանք՝ առաջին քրիստոնյան Շարմազանովն է:

Սիրեք միմյանց, օգնեք միմյանց, աջակցեք միմյանց. մոտավորապես ասել է Շարմազանովը: Իսկական սեր և հավատ, նվիրվածություն և բարեգթություն մարդկության և Բարձրյալի հանդեպ: Իսկ ոչ ոք չէր հավատում, որ Շարմազանովը մի օր հեզաճկուն քրիստոնյա է դառնալու, սակայն այդ օրը եկավ՝ Վիգեն Սարգսյանի խաչքավորությամբ:

NEWSPRESS.am