Կարագի, հավի մսի, ձեթի, ձկան և կաթնամթերքի վրա թանկացումները էական ազդեցություն չեն ունենա

ՀՀ տնտեսական մրցակցության պաշտպանության պետական հանձնաժողովն ուսումնասիրություններ է կատարել և պարզել, որ  բենզինի և դիզելային վառելիքի գները Հայաստանում և Վրաստանում գրեթե նույնն են։ Այս մասին այսօր լրագրողների հետ հանդիպմանն ասաց հանձնաժողովի նախագահ Արտակ Շաբոյանը։

Նրա խոսքով՝ տարբերությունն այն է, որ Հայաստան ներկրվող բենզինը տեղափոխվում է Վրաստանի տարածքով երկաթուղային տրանսպորտի միջոցով, և ՏՄՊՊՀ-ի հաշվարկներով՝  տեղափոխման ծախսերը էական ազդեցություն են ունենում բենզինի գների վրա։ Սրան էլ ավելանում է նաև այն, որ Վրաստանը ներկրումներ է իրականացվում նաև Ադրբեջանից և Թուրքիայից։

«Այս բոլոր գործոնների պարագայում այս պահին Հայաստանում և Վրաստանում ինչպես բենզինի, այնպես էլ դիզելային վառելիքի գները գրեթե նույնն են»,-պարզաբանեց նա:

Ինչ վերաբերում է հարկային փոփոխություններով պայմանավորված թանկացումներին,  ապա ՏՄՊՊ-ի հաշվարկները ցույց են տվել, որ գնային բարձրացումներն ամբողջությամբ պայմանավորված են հունվարի 1-ից ուժի մեջ մտած Հարկային օրենսգրքով նախատեսված փոփոխություններով:

«Մեր մոնիթորինգի համաձայն՝ 1 լիտր բենզինը թանկացել է 20, դիզելային վառելիքը՝ 60, իսկ բնական սեղմված գազի 1խմ 20 դրամով: Կատարված հաշվարկները ցույց են տալիս, որ հունվարից բենզինի ներմուծման ակցիզային հարկը 1 տոննայի հաշվով նախկին 25.000 դրամի փոխարեն դարձել է 40.000 դրամ, բացի այդ, մաքսային սահմանին վճարվող ակցիզային հարկի և ԱԱՀ-ի հանրագումարը 120 000 դրամից, դարձել է 135 000 դրամ, ինչն էլ, բնականաբար անդրադարձել է վերջնական գնի վրա»,-ասաց նա:

Դիզելային վառելիքի և սեղմված բնական գազի շուկաների դեպքում ակցիզային հարկը նվազել է, փոխարենը ավելացել է ԱԱՀ-ն, որը մինչ այդ չի եղել:

«Նշված փոփոխությունները մեր հաշվարկներով 1 լիտր դիզելային վառելիքի վրա կարող էին անդրադառնալ մոտ 60 դրամով»,-նշեց Արտակ Շաբոյանը։

ՏՄՊՊՀ նախագահի խոսքով՝ ԵԱՏՄ անդամակցությունն էական ազդեցություն չի ունենա սոցիալական նշանակության 4-5 ապրանքի թանկացման վրա՝ կարագ, հավի միս, ձեթ, ձուկ և կաթնամթերք։

«Նախ մեր երկիրը բավականին զարգացած տեղական արտադրություն ունի, ինչի հաշվին հիմնականում պահանջարկը բավարարվում է, և, ապա, այդ ապրանքների հիմնական մասը ներկրվում է հենց ԵԱՏՄ-ից և ոչ երրորդ երկրներից։ Կարագի շուկայում էլ գների նվազեցման միտում կա»,-նշեց Շաբոյանը։