Ինչո՞ւ է ձգձգվում Մխիթարյանի ու Սանչեսի փոխանակությունը

Ինչպես արդեն հայտնել ենք, երեկ համաշխարհային սպորտային պարբերականները գրում էին Մխիթարյանի ու Սանչեսի փոխանակման մասին։ Պարբերականները վստահորեն հայտնում էին, որ ժամեր հետո «Մանչեսթեր Յունայթեդն» ու «Արսենալը» կտեղեկացնեն սուպերփոխանակման մասին։ Արդեն այսօր պարբերականները նշում են, որ փոխանակումը ձգձգվում է, քանի որ Մխիթարյանի գործակալ Մինո Ռայոլան ցանկանում է, որ Հենրիխը «Արսենալում» ստանա այնքան աշխատավարձ, որքան ստանում էր Սանչեսը։

Մյուս կողմից գերմանական սպորտային պարբերականները նշում են, որ Դորտմունդի «Բորուսիայի» գաբոնցի հարձակվող Օբամեյանգը համաձայնվել է տեղափոխվել «Արսենալ» միայն այն պայմանով, եթե «Արսենալը» կիրականացնի Մխիթարյանի տրանսֆերը։ Օբամեյանգը ցանկանում է վերամիավորվել իր նախկին թիմակցի հետ նույն ակումբում։ Պատահական չէ, որ Ռայոլան ցանկանում է, որ Մխիթարյանն «Արսենալում» ստանա բարձր աշխատավարձ, քանի որ այդ տրանսֆերից Ռայոլան ունի մեծ ու կլորիկ գումար։

Պետք է հասկանալ նաև, որ Մինո Ռայոլան ֆուտբոլային աշխարհում ամենաազդեցիկ գործակալներից է, ով իր ֆուտբոլիստներին ապահովում է լավ թիմ, լավ աշխատավարձ ու լավ պայմաններ, քանի որ դրա դիմաց ստանում է բարձր գումարներ։ Անգլիական մամուլն արդեն հիմա գրում է, որ Սանչեսն իր համաձայնությունը հայտնել է, գումարային բոլոր հարցերը լուծված են, սակայն նա սպասում է Հենրիխի որոշմանը։ Ստացվում է այնպես, որ Հենրիխի երկար ու մեծ լռությունից հետո հավանաբար կլինի տրանսֆերային լուրի մեծ պայթյունը։

NEWSPRESS.am sport