Ոչ ոք չի ուզում մեռնել, անգամ՝ Ռալֆ Յիրիկյանը, իսկ Արմեն Սարգսյանը պատրաստ է

Սահմանադրական փոփոխություններից հետո Հայաստանը պետք է ընտրի սահմանադրական նախագահ, այն է՝ շռայլություն երկրի համար: Եթե Մեծ Բրիտանիայի թագուհին այդ երկրի կենդանի մարմնացումն է ու միապետության խորհրդանիշը, ապա Հայաստանում անգամ որևէ խելքը գլխին բնորոշում չկա երկրի 2018-ի նոր նախագահի համար:

Նա պետք է լինի լեզուների գիտակ, միջազգայնորեն ճանաչված անձ, որևէ կուսակցության չպատկանի. իհարկե, լավ կլիներ, որ այս տվյալներով նախկինում ընտրեին նախագահներ, ոչ թե հիմա:

Նման բարձր կարողությունները խոսում են ինտելեկտի, աշխատասիրության, նաև հայրենասիրության մասին:

Ինչո՞ւ հայրենասիրության. որովհետև դժվար է սիրել հայրենիքը և այսօր լինել որևէ կուսակցության շարքերում, այնքան է կուսակցականությունն արժեզրկվել, նաև բարոյազրկվել:

Ասում են, որ Ռալֆ Յիրիկյանը հրաժարվել է ՀՀ 4-րդ նախագահը լինելու պատվից: Իհարկե, կհրաժարվի՝ «Վիվա Սելլ»-ում կայուն եկամուտ կա, հանրությունն ընդունում է նրան, թեև այնքան էլ լավ չի ճանաչում, նա բազմաթիվ կապեր է ստեղծել Հայաստանում և արտերկրում՝ ապահով կյանք ունենալու համար, ինչո՞ւ պետք է համաձայնի նման տաժանակրության՝ այն էլ ոչնչի համար:

Երբ արդեն ՀՀ նախագահի պաշտոնը ոչինչ չի ասում, արդեն մտածում են, որ ընդունելի և խելացի մարդ պետք է այդ պաշտոնում նշանակվի, այդ մասին ավելի վաղ ինչո՞ւ ոչ ոք չէր մտածում, միայն այն ժամանակ, երբ արդեն ՀՀ նախագահ ասվածը մեծ հաշվով արդեն գրեթե լիազորություններ չունի:

Այսօր արդեն հայտնի է ՀՀ նախագահի՝ ՀՀԿ թեկնածուի անունը՝ Արմեն Սարգսյան:

Ի դեպ, Սարգսյան ազգանունը Հայաստանի բրենդն է դառնում ու ճակատագրական է:

Նշենք, որ ՀՀ նախկին վարչապետ Արմեն Սարգսյանը «Lydian International»-ի տնօրենների խորհրդի անդամ է, որն իրականացնում է Ամուլսարի ոսկու հանքավայրի շահագործման նախագիծը: Արմեն Սարգսյանը ՀՀ վարչապետի պաշտոնը զբաղեցրել է 1996-1997 թթ.: Նա նաև Միացյալ Թագավորությունում Հայաստանի դեսպանն է: Եղել է Վերակառուցման և զարգացման եվրոպական բանկի (EBRD) նախագահի խորհրդականը 1999-2000թթ.: Հիշեցնենք, որ EBRD-ին «Lydian International» ընկերության բաժնետերերից մեկն է, որի ակտիվներում Ամուլսարի նախագիծը հիմնականն է:

Մամուլում տեղեկություններ կային, որ Արմեն Սարգսյանը ձեռք է բերել Աշոտ Արսենյանին պատկանող «Ջերմուկ գրուպ» ընկերության 50 տոկոսը, ձեռք բերել «Պեպսի-կոլա» ընկերության բաժնետոմսերի խոշոր փաթեթ և Հարավային Կովկասում «Պեպսի-կոլայի» կառավարման իրավունքը և նման մեծ ու փոքր բիզնեսների հետ կապված տեղեկություններ:

Ըստ ամենայնի, եթե Արմեն Սարգսյանը գա Հայաստան ապրելու, նա այստեղ խոշոր բիզնեսներ ունի, ինչպես ասում էր Հակոբ Պարոնյանը, նա «կովերու, ագարակներու տեր է», իսկ դրա համար արժե ՀՀ նախագահ դառնալ:

NEWSPRESS.am