Լուր, որին սպասում է ամբողջ հայ ժողովուրդը․ «Հենո, դուխով»  

Վերջին օրերին Հայաստանում քննարկվում են քաղաքական ու տնտեսական լուրջ (4-րդ նախագահի ու թանկացումների մասին) լուրեր, սակայն այս ամենի հետ մեկտեղ ամենաքննարկվողը՝ Հենրիխ Մխիթարյանի՝ «Արսենալ» տեղափոխության թեման է։ Այս թեման քննարկվում է և՛ համացանցում, և՛ սոցիալական կայքերում, և՛ հեռուստատեսությամբ։ Այս թեման քննարկվում է երթուղային ավտոբուսներում, կանգառներում, փողոցներում ու ընտանեկան կլոր սեղանի շուրջ։

Վերջին մի քանի ժամվա ընթացքում անգլիական ու եվրոպական մամուլը տեղեկացնում է լուրեր, որոնք գրեթե վերջնականապես փակած են համարում Մխիթարյանի տեղափոխությունն «Արսենալ»։ Մխիթարյանի ու «Արսենալի» համաձայնությունն արդեն փակված են համարում ֆրանսահայ սպորտային լրագրող Տիբո Վեզիրյանը, հայտնի իտալացի  սպորտային լրագրող Ջանլուկա դի Մարցիոն, The Guardian, Mirror ու Independent հեղինակավոր պարբերականները։

Արդեն քիչ առաջ Sky Sport-ը հայտնեց, որ «Արսենալն» ու Հենրիխ Մխիթարյանն արդեն համաձայնության են եկել, և ժամեր հետո պաշտոնապես կհայտարարվի հայ ֆուտբոլիստի տեղափոխության լուրը։

Այս լուրին սպասում է ամբողջ ֆուտբոլային աշխարհը, սպասում են «Արսենալի» երկրպագուները, իսկ ամբողջ հայ ազգն անհամբեր սպասում է, թե երբ է լինելու պաշտոնական հայտարարությունը։ Սոցիալական ցանցերում հայ երկրպագուներից շատերն արդեն հավանել են «Արսենալի» պաշտոնական էջը, ոմանք պատրաստել են Մխիթարյանի անունով «Արսենալի» շապիկներ, ոմանք վերլուծում են, թե ո՞ր դիրքում է խաղալու Մխիթարյանը։

Հայ ֆուտբոլասերներն արդեն հետևում են «Արսենալի» այսօրվա հանդիպմանը՝ որպես Մխիթարյանի ակումբի։ Մի շարք երկրպագուներ հայհոյում են Ժոզե Մոուրինյոյին, իսկ ոմանք էլ փորձում են հաշվարկել ու հասկանալ, թե շաբաթական ինչքա՞ն գումար է ստանալու Հենրիխ Մխիթարյանն ու անգամ, թե ինչպե՞ս է ծախսելու։ Այս լուրին սպասում են ֆուտբոլասերները, սպասում են «Արսենալի» երկրպագուները, սպասում է  ամբողջ հայ ազգը։

NEWSPRESS. am sport