Կարեն Կարապետյանը հորեղբոր որդուն «զաչոտից» կտրել է

Շաբաթ օրը վարչապետ Կարեն Կարապետյանին ներկայացվել է ՀՀ գյուղատնտեսության նախարարության Սննդամթերքի անվտանգության պետական ծառայության՝ 2017 թ. գերակա խնդիրների կատարման և միջոցառումների իրականացման արդյունքները, ինչպես նաև 2018 թ. անելիքները:

Ասել է թե՝ Կարեն Կարապետյանի հորեղբոր որդին, «Հայռուսգազարդ»-ում իր տեղակալի պաշտոնը զբաղեցնող Իշխան Կարապետյանը «զաչոտի» էր եկել:

Այն, որ նշանակման օրվանից այս պաշտոնյան հայտնվում է սկանդալների կիզակետում, հայտնի է հետաքրքված մարդկանց. նախ՝ անհայտ ծագման սննդամթերք, սխալ մակնշումներ, էլ չասենք՝ ադրբեջանական խնձոր և պրոֆեսիոնալ կադրերի հեռացում աշխատանքից: Սա Կարապետյանի պաշտոնի կենսագրությունն է՝ դաջված մամուլում:

Ամեն դեպքում, անցնելով բուն հանդիպմանը՝ պետք է նկատել, վարչապետը պահոցից հանել էր դիտողությունների և խրատների ողջ պաշարը: Էլ ինչպե՞ս մենեջեր Կարապետյանն ասեր, որ տեղից շարժվել է պետք, թե չէ նշանակումից ի վեր աթոռին գամված, տեղից չշարժվող պաշտոնյան ձեռքբերումներ չի կարող արձանագրել: Մասնավորապես, Կարեն Կարապետյանն առաջադրանք տվեց՝ հետազոտել, թե ինչ ազդակներ է պետք ուղարկել աշխարհին, այստեղ ամբողջ ազգով կորած ենք, որովհետև եթե երկրից ազդակներ ուղարկող պաշտոնյան Իշխան Կարապետյանի պես լուռ ու մունջ պաշտոնյան է, հետևաբար ազդակի լրջագույն կորուստ ենք ունենալու:

Վարչապետի մյուս դիտարկումը բիզնեսը չխեղդելու մասին է.

«Ձեր ծառայությունը չափազանց կարևոր է, որպեսզի բիզնեսը չխեղդենք: Եվ բացի նրանից, որ մենք իրականում պարտավոր ենք մեր քաղաքացիներին ձեր աշխատանքով երաշխավորել, որ եթե իրենք, օրինակ, թթվասեր են գնում կամ մեկ այլ բան, հավատացած լինեն, որ ծառայություն կա, որ իրենց շահերը պաշտպանում է, և բիզնեսը գերշահույթ կամ այլ շահույթ ստանալու համար չի խախտում այդ նորմերը: Բայց բացի դրանից, չափազանց կարևոր գործառույթ է, որ դուք բիզնեսի համար բարենպաստ պայմաններ ստեղծեք, որ կարողանա շուկաներ մտնել»:

Նկատենք, որ այս դիտողություններից, առաջադրանքներից կամ ինչպես դուք կցանկանաք վերաբերմունքը որակել, այս ամենից հետո նկատելի է, որ Կարապետյանը ոլորտում թերություններ տեսավ թե՛ արտաքին աշխարհում հարաբերվելիս, և թե՛ ներքին: Նա թեկուզ «պրոտոկոլային» խոսքով չարձանագրեց ոչ մի հաջողություն: Թերևս սա խոսում է այն մասին, որ Իշխան Կարապետյանն, ամեն դեպքում, «զաչոտից» կտրված է և նրան պարզապես սթափվել է պետք՝ փափուկ աթոռին նստելու համար:

NEWSPRESS.am