Կանաչ «Ժիգուլի»-ն հրելը կրեատիվ չէ, գնաճն էլ սարսափելի չէ. Աղվան Վարդանյան

Հայաստանում նկատվող գնաճը սարսափելի չէ միայն հանրապետականների և Հայ Հեղափոխական Դաշնակցության անդամների համար: Համենայն դեպս, դաշնակցականներից Աղվան Վարդանյանը հայտարարել է, որ սարսափելի ոչինչ չի տեսնում:

Նա գնաճի չափը գնահատում է «Ելք» դաշինքի անցկացրած երթի մասնակիցների քանակի չափով: Փոխարենն Աղվան Վարդանյանը կառավարության աշխատանքը գերազանց է գնահատում:

«Կառավարության 2017թ. գործունեությունը, կարծում եմ, պետք է որ ձեր աչքի առաջ լիներ: Կառավարության նման արդյունավետ աշխատանք մենք վերջին տասնամյակում, թերևս, չենք ունեցել բոլոր ցուցանիշների առումով»,- լրագրողների հետ զրույցում ասաց Աղվան Վարդանյանը: Նա սարսափելի ոչինչ չի տեսնում նաև բենզինի, դիզվառելիքի և սեղմված գազի գների բարձրացման հետ կապված: Վարդանյանը, ինչպես և վարչապետ Կարապետյանը, նկատում է. «Բենզինը թանկ է, կարող են գազով քշել»:

«Իմ անձնական մեքենան, երբ գազ չէի տեղադրել, երեք անգամ ավելի թանկ էի վճարում»,-նշում է Վարդանյանը:

Նա նաև տեղին չի համարում կառավարությանն ուղղված այն մեղադրանքները, թե թանկացումների պատճառը կառավարությունն է:

«Մեր գործընկերները բողոքում են կարտոֆիլի թանկացումից: Կարտոֆիլն էլ կառավարությունը չի թանկացրել, դա մեր գյուղացու արտադրանքն է: Նույն սեղմած գազի գինն ընդամենը 20 դրամով է բարձրացել՝ ճիշտ այնքան, որքան բարձրացել է հարկային դրույքաչափը»,- ասաց նա:

Պատգամավորի դիտարկմամբ՝ ընդհանուր առմամբ թանկացումներին մոտեցումն օբյեկտիվ չէ: Նրա կարծիքով՝ ցանկացած բողոքի ակցիա ավելի լայն աջակցություն կստանար, եթե լիներ հիմնավորված:

«Երթեր ու ցույցեր անցկացնող մեր գործընկերն ավելի կրեատիվ մտածողություն պետք է ունենային: Չեմ կարծում, որ կանաչ «Ժիգուլի»-ն հրելը կրեատիվ մտածողության արդյունք է»,- ընդգծեց պատգամավորը: