Աղվեսը պոչին է վկա բերում. «Ջավադյա՛ն, ամոթ չունես, խե՞լք էլ չունես»

Այսօր Ազգային ժողովում քննարկումների ժամանակ Կենտրոնական բանկի նախագահ Արթուր Ջավադյանն ասել է, որ կարագը թանկացել է, որովհետև ուսումնասիրությունները ցույց են տվել, որ կարագն ավելի օգտակար է, քան ձեթը. ձեթի մեջ հայտնաբերվել են կանցերոգեն նյութեր. կարճ ասած՝ թանկության պատճառն առողջարար կարագի պահանջարկի ավելացումն է:

Ի դեպ, օգտատերերից մեկն այս առիթով գրել է.

«Ամոթ չունես, խե՞լք էլ չունես»:

Նշենք, որ գնաճի վերաբերյալ կան տարաբնույթ տնտեսական բանաձևեր, մեկնաբանություններ, սակայն սիրուց կարագի թանկացում, երևի Ջավադյանի հեղինակային ստեղծագործությունն է և պետք է այն պաշտպանվի ինչպես հարկն է:

Եթե այսօր Ջավադյանի բանաձևն անհեթեթ է հնչում, ապա չի բացառվում, որ այնպիսի իրավիճակ լինի, որ Ջավադյանը ճշմարիտ դուրս գա:

Ակնհայտ է, որ թանկացումները պարզապես մոնոպոլ տնտեսության արդյունք են. խոշոր ներկրողները թանկացնում են այս կամ այն ապրանքը՝ ըստ ցանկության, և դրա համար որևէ իրական պատճառ պետք չէ: Ջավադյանի նման պաշտոնյաներն էլ չեն կարող մեղադրել ներկրողներին՝ նրանց մեղադրելով անհիմն թանկացումների մեջ, մտմտում են որևէ հիմնավոր դրդապատճառ, սակայն քանի որ կա բուն պատճառը, բոլոր մնացած մեկնաբանություններն արդեն ծիծաղելի են:

Ի դեպ, Արթուր Ջավադյանը զարգացրել է իր տեսությունը. ըստ նրա՝ Հայաստանում միջին և նվազագույն աշխատավարձերի և կենսաթոշակների առումով վիճակն ավելի լավ է, քան Վրաստանում ու Ադրբեջանում:

Ջավադյանն ասել է՝ թե՛ Վրաստանի, թե՛ Ադրբեջանի համեմատ Հայաստանում միջին և նվազագույն աշխատավարձերն ու կենսաթոշակներն ավելի բարձր են, նաև շեշտել, որ դրա մասին են վկայում Համաշխարհային բանկի, Առևտրի միջազգային հիմնադրամի՝ այդ երկրների մասին վիճակագրական ծառայությունների տվյալները և մյուս բաց աղբյուրները:

Ինչ վերաբերում է ՀՆԱ-ին, ապա, ըստ Ջավադյանի, Հայաստանում և Ադրբեջանում մեկ շնչին բաժին ընկնող ՀՆԱ-ն այս պահին գրեթե նույն մակարդակի վրա է. տարբերությունը շատ փոքր է: Ինչպես ասում են, եթե հավատում ես հրաշքին, չի բացառվում, որ այն ինչ-որ ժամանակ տեղի ունենա:

NEWSPRESS.am