Վարչապետը Սինգապուրը լուրջ է ընդունել. ինչ են խոսել Դավոսում

Եթե հիշում եք, վարչապետ նշանակվելու օրերին շատ էր խոսվում այն մասին, որ Կարեն Կարապետյանը Հայաստանը կդարձնի Սինգապուր:

Իհարկե, չէր խոսվում այն մասին, թե Սինգապուրի որ թվականների մասին էր խոսքը, բայց, միևնույն է, Կարեն Կարապետյանը լծվել է Հայաստանը Սինգապուր դարձնելու գործին:

Հիշեցնենք, որ այդ երկիրն աշխարհում զբաղեցնում է վեցերորդ տեղը` բնակչության մեկ շնչին ընկնող բարձր ՀՆԱ-ով՝ 85.300 դոլար, բայց Աստված չանի, որ Կարեն Կարապետյանը Հայաստանը վերածի այդ երկրի մինչև առաջին վարչապետ Լի Կուան Յունի ժամանակների երկիրը, այսինքն՝ աղքատ, բառի բուն իմաստով՝ խոզանոցի, որտեղ, այո, մարդիկ ապրում էին խոզերի հետ:

Այս օրերին Դավոսում ընթացող Համաշխարհային տնտեսական համաժողովի շրջանակներում Կարեն Կարապետյանը հանդիպում է ունեցել Սինգապուրի փոխվարչապետ, տնտեսական և սոցիալական քաղաքականության համակարգող նախարար Թարման Շանմուգարատնամի հետ:

«Մենք շահագրգռված ենք խթանել բանակցությունները Եվրասիական տնտեսական միության և Սինգապուրի ազատ առևտրի գոտու միջև: Այդպիսի համագործակցությունը կարող է նպաստել առևտրի ու ներդրումների աճին և փոխշահավետ ծրագրերի իրականացմանը»:

Այսինքն՝ գործնականում Հայաստանը փորձում են տանել Սինգապուրի ուղիով, իսկ թե ինչպես կստացվի դա վարչապետի մոտ, այս կարճ ժամանակահատվածում դժվար է ասել, քանի որ նշանակման օրվանից ի վեր նրան հաջողվել է միայն այս համատեքստում նման՝ ոտքի վրա հանդիպում կազմակերպել, ոչինչ ավելին: Իսկ այն, որ վարչապետի պաշտոնավարման լիմիտը սպառվում է 2018-ի ապրիլի 8-ով, դա հայտնի է շատերին, այսինքն՝ շատ քիչ ժամանակ է մնացել Սինգապուրյան երազի կատարմանը, իսկ ինչպես վարչապետն էր ասում Ազգային ժողովում «Հայաստանի տնտեսության վիճակը չափազանց ծանր է, արագ փոփոխության հույս ունենալ պետք չէ, քանի որ չկա կախարդական փայտիկ»:

Իսկ հիմա, առանց կախարդական փայտիկի, ինչպես նրա մոտ կստացվի փոփոխություններ կատարել, չենք էլ կարողանում պատկերացնել:

NEWSPRESS.am