Դուբայում կայացել է Արթուր Բաղդասարյանի դստեր նշանդրեքը. ծախսը՝ աշխատողների աշխատավարձի հաշվի՞ն

Մամուլում շրջանառվող լուրերի համաձայն՝ «Հայկական վերածնունդ» կուսակցության նախագահ Արթուր Բաղդասարյանը որոշել է «Հ3» հեռուստաընկերությունից դուրս եկած աշխատակիցների աշխատավարձերը չվճարել։ Սա հատուկ ձեռագիր է Բաղդասարյանի համար, ով սիրում է աշխատեցնել մարդկանց և չվճարել դրա դիմաց, կամ էլ, լավագույն դեպքում, փոխհատուցել պահածոներով ու խմիչքներով։

NEWSPRESS.am-ի տեղեկություններով՝ Բաղդասարյանին պատկանող, Հայաստանում եվրոպական կրթական տարածաշրջանային ակադեմիայի աշխատակիցներին մոտավորապես նույն ճակատագիրն է սպասում։ Ավելի կոնկրետ, աշխատակիցներին նախապես ասել են, որ աշխատանքը կվերսկսեն հունվար ամսվա վերջին ու չնայած դրան՝ նրանց արդեն աշխատանքի են կանչել։ Որոշ տեղեկություններ կան նաև, որ այս ամսվա աշխատած օրերի դիմաց աշխատողները չեն վճարվելու։

Այլ կերպ ասած՝ Արթուր Բաղդասարյանին պատկանող բոլոր հաստատություններն աշխատում են միևնույն «կանոնակարգով»՝ աշխատել և չվճարվել։

Բաղդասարյանն այնքան է ուշացնում աշխատավարձերը, որ նրա աշխատողները մի տեսակ կարծես «չվարձատրվելու իմունիտետ» են ձեռք բերել ու դրա մասին խոսում են հանգիստ ու ներողամտաբար․ մոտավորապես՝ «դե կտա էլի» կամ «կարող ա տա» ոճի մեջ՝ գիտակցելով, որ եթե չսպասեն աշխատավարձի և թքեն ու հեռանան աշխատանքից, ապա «կարող ա»-ների հավանականությունն իսպառ վերանում է և լիովին մնում են ձեռնունայն։

Ու քանի դեռ աշխատողները հոժարակամ ենթարկվում են Բաղդասարյանի թրաֆիքինգին, Բաղդասարյանը շարունակում է «օլիգարխի կայֆերով» փողեր շռայլել իր հաճույքներին։

Ի դեպ, հավելենք, որ նա վերջերս է վերադարձել Դուբայից, որտեղ էլ կայացել է ավագ դստեր՝ Էլինայի նշանդրեքը:

Բոլոր դեպքերում, Էլինային ընտանեկան երջանկություն ենք մաղթում և հույս հայտնում, որ գոնե այս հրապարակումից հետո նրա հարուստ հայրիկը ձեռքը գրպանը կտանի և աշխատողների արդար չարությունը չի թողնի նշանդրեքի ճոխ սեղանին…