Մադրիդում պատրաստ են հուղարկավորել Զինեդին Զիդանին․ ֆրանսիացին շարունակում է պայքարել

Եթե ասենք, որ այս մրցաշրջանում Մադրիդի «Ռեալը» վատ է խաղում, ապա կստացվի ոչինչ չասել։ Մրցաշրջանի սկզբում սկսեցին քննադատել «Ռեալին» ու կանխատեսել, որ տրանսֆերների բացակայության պատճառով այս տարին շատ բարդ կլինի «Ռեալի» համար։ Մասնագետներն ու երկրպագուները ճիշտ էլ կանխատեսնում էին։ «Ռեալը» հիմա խաղում է, մեղմ ասած, շատ վատ ֆուտբոլ։ Քննադատությունների ամենամեծ ալիքը բարձրացած է թիմի գլխավոր մարզիչ Զինեդին Զիդանի դեմ։ «Ռեալի» երկրպագուները թիմի թվիթերյան միկրոբլոգում ամենադաժան ձևով քննադատում են Զինեդին Զիդանին․

«Եթե այսպես մի քանի խաղ էլ շարունակվի, ապա մենք նույնիսկ դուրս կմնանք Եվրոպալիգայի գոտուց»:

«Զիդանին պետք է տանել հնարավորինս հեռու «Ռեալի» մարզաբազայից»:

«Մահ Զիդանին»։

Վերոնշյալ մեկնաբանություններից արդեն պարզ է դառնում, որ Մադրիդում արդեն ատում են իրենց երբեմնի սիրելի մարզիչին, ով «Ռեալին» բերեց այնպիսի հաջողություններ, որոնք ռեկորդային են համաշխարհային ֆուտբոլի պատմության մեջ։ «Ռեալի» երկրպագուները պետք է հասկանան նաև, որ հավիտենական մարզիչներ չկան (իհարկե, սա չի վերաբերում 2 այլմոլորակային բացառություններին՝ Ալեքս Ֆերգյուսոնին ու Արսեն Վենգերին-հեղ.), և ուշ թե շուտ եվրոպական թոփ ակումբները մի քանի տարին մեկ ունենում են նոր մարզիչներ, ձեռք են բերում նոր խաղամակարդակ, փիլիսոփայություն ու ֆուտբոլային ձեռագիր։

Իսպանական հեղինակավոր ֆուտբոլային պարբերականներն արդեն գրում են, որ Չեմպիոնների լիգայի խաղարկության 1/8-րդ եզրափակչում ֆրանսիական «ՊՍԺ-ի» դեմ հանդիպումից հետո պարզ կդառնա Զիդանի ճակատագիրը։ Եթե «Ռեալը» պարտվի, ապա Զիդանին կհեռացնեն իր պաշտոնից։ Արդեն հիմա երևում է, որ Մադրիդի «Ռեալը» կորցրել է իր ֆուտբոլային ձեռագիրն ու իրավիճակի շտկման համար քիչ ժամանակ է պետք, քանի որ մրցաշրջանի երկրորդ ու վճռորոշ մասն է, որից էլ կախված է «Ռեալի» մյուս տարվա կարգավիճակն ու մրցելույթների տեղը։

«Ռեալն» ամռանը տրանսֆերներ չիրականացրեց ու դրա համար էլ հիմա իրավիճակի շտկումը շատ դժվար է։ Խոսակցություններ կան, որ ձմեռային տրանսֆերային պատուհանի ժամանակ «Ռեալը» կիրականացնի սուպերտրանսֆեր։ Իսպանական ու իտալական պաբերականները գրում են, որ «Ինտերի» արգենտինացի հարձակվող Մաուրո Իկարդիի տրանսֆերի շուրջ բանակցությունները նոր թափ են հավաքում։

Զիդանն իր առաջ ունի նույն ֆուտբոլիստներին ու հիմա պետք է կատարի կամ տակտիկական փոփոխություններ, կամ պետք է մոտիվացնի թիմին այլ միջոցներով, կամ էլ պիտի այնպես անի, որ լավ մարզավիճակ ձեռք բերեն «Ռեալի» հիմնական կազմի ֆուտբոլիստները։ Ֆրանսիացի մասնագետը հիմա կանգնած է շատ բարդ խնդրի առաջ, որը հավասարապես և՛ հեգեբանական խնդիր է, և՛ տեխնիկական։ Զիդանը փնտրում է տարբերակներ իրեն ու թիմին փրկելու համար, իսկ Արքայական թիմի երկրպագուներն ամեն օր շարունակում են իրենց բացասական վերաբերմունք արտահայտել թիմի գլխավոր մարզչի հասցեին։

NEWSPRESS.am Sport