«Նազարբաևի գրքի շնորհանդեսը՝ Ցեղասպանության թանգարան-ինստիտուտո՞ւմ». Ֆեյսբուքը ծաղրում է

Վերջին մի քանի օրվա ընթացքում համացանցում ու սոցիալական կայքերում քննարկվում էին Միխեիլ Սաակաշվիլու «Ուժերի զարթոնք» գրքի շուրջ ծավալված իրադարձությունները։ Փետրվարի 7-ին Եղիշե Չարենցի տուն-թանգարանում պետք է կայանար գրքի շնորհանդեսը, սակայն օրեր առաջ այն չեղարկվեց։ Թանգարանի տնօրենի ու գրքի թարգմանչի՝ Միքայել Նահապետյանի միջև նախնական համաձայնություն եղել էր, սակայն օրեր առաջ թանգարանի տնօրենը կապ է հաստատում Միքայել Նահապետյանի հետ և նշում, որ տեխնիկական խնդիրների պատճառով շնորհանդեսը չի կարող կայանալ։

«Հրապարակի» տեղեկություններով՝ Մշակույթի նախարարությունն արգելել է, որ Չարենցի տուն-թանգարանում տեղի ունենա Սաակաշվիլիի «Ուժերի զարթոնք» գրքի շնորհանդեսը։ Գրքի շնորհանդեսի չեղարկումից հետո սոցիալական կայքերում սկսեցին քննարկել այս հարցը։ Շատերը նշեցին, որ պետությունն արգելում է Սաակաշվիլիի գրքի շնորհանդեսը, քանի որ նա հայտնի է իր հակառուսական քաղաքականությամբ և դրա համար էլ մեր իշխանությունները չեն ցանկանում, որ տեղի ունենա այդ գրքի շնորհանդեսը։

Համացանցում ոմանք էլ անդրադարձան այն խնդրին, թե արդյո՞ք տրամաբանական է՝ հակահայկական քաղաքականություն վարած քաղաքական գործչի գրքի շնորհանդեսը տեղի ունենա Եղիշե Չարենցի տուն-թանգարանում, ով զոհ դարձավ 37 թվականի հակահայ քաղաքականության արդյունքում։ Ֆեյսբուքի օգտատեր Գևորգ Գյուլումյանն էլ համեմատություններ էր տարել և նշել․

«Էդ մոտավոր նման ա նրան, որ վաղը ցեղասպանության թանգարան-ինստիտուտում Ղազախստանի նախագահ Նազարբաևի գրքի շնորհանդեսն արվի…»։

Ստացվում է այնպես, որ այս գրքի շնորհանդեսի շուրջ քննարկվող թեմաները բազմաշերտ են։ Մի մասը գտնում է, որ պետք է գրքի շնորհանդեսը տեղի ունենա, իսկ ոմանք էլ պնդում են, որ անազնիվ է, որ հակահայ քաղաքական գործչի գրքի շնորհանդեսը տեղի ունենա հենց Եղիշե Չարենցի տուն-թանգարանում։ Հասկանալու համար, թե արդյո՞ք Սաակաշվիլին հակահայ քաղաքական գործունեություն է վարել, թե ոչ, պետք է այցելել Ջավախք։

Սաակաշվիլու օրոք Վրաստանում արգելվում էր հայալեզու գրականության մուտքը։ Այդ քաղաքականությունը շարունակվում է նաև հիմա։ Իսկ Եղիշե Չարենցի տուն-թանգարանի տնօրինությունը ցանկանում էր Սաակաշվիլու գրքի շնորհանդեսն անցկացնել թանգարանում։ Մի մարդու թանգարանում, ով զոհ դարձավ Սովետական Միության հակահայկական քաղաքականության արդյունքում։

NEWSPRESS.am Culture