Ո՞վ է նախարարության ճոխ տոնի հաշիվը փակելու՝ 1 մլն արտագաղթա՞ծը, թե՞ 1 մլն աղքատը

«Բանակը չբարեփոխել անհնար է: Դա ոչ միայն մենք թույլ չենք տա, այլ նաև աշխարհը»:

Սա ԳԽ նախկին պատգամավոր Ազատ Արշակյանի տեսակետն է, ով խոստովանում է՝ Պաշտպանության նախարար Վիգեն Սարգսյանը բարեփոխումներ անում է. «Լավ է, որ Վիգեն Սարգսյանի բարեփոխիչ է: Ես գիտեմ, որ բարեփոխումներ կան: Դրական տեղաշարժեր շատ կան․․․ Առաջ մարգարին էին տալիս, հիմա՝ կարագ»,-լրագրողների հետ զրույցում ասաց Ազատ Արշակյանը։

Ինչ վերաբերում է ոլորտում չարաշահումներով աչքի ընկած պաշտոնյաների կրճատումներին, ապա, ըստ Արշակյանի, պաշտոնանկությունն արդեն իսկ պատիժ է․ «Այդպիսի աշխատանքից հեռացնելը շատ մեծ պատիժ է նրանց համար»:

Բացի այդ, նա նշում է, որ 45 տարին լրացած գեներալն արդեն իսկ պետք է թոշակի անցնի, որպեսզի իր տեղը զիջի երիտասարդներին։

Անդրադառնալով նախարարությունների կողմից Ամանորի կորպորատիվների համար ծախսած միլիոններին՝ Ազատ Արշակյանը մեջբերեց Ասվածաշնչյան խոսքը, ըստ որի՝ «ճոխությունները հոռի վարքեր են», իսկ դատապարտված հոռիները մեր իշխանությունում վխտում են:

«Իշխանությունը պետք է խնայող լինի, բայց իշխանությունը հայկական չի, խնայող չի, մսխում է մեր ռեսուրսները։ Համաձայն եմ, որ տոնը պետք է ճոխ լինի, շեփորներ լինեն, ծաղիկներ ու խնջույքներ, բայց ձեր հնարավորությունների հաշվով արեք: Ո՞վ է հաշիվը փակելու, այն մեկ միլիոն արտագաղթա՞ծը, մեկ միլիոն աղքա՞տը: Ամեն տոնակատարություն հայ ժողովրդի համար դառնում է մի անբարեկարգ դպրոց, հիվանդանոց, զոհաբերվում է զինվորականների պահուստը»: