«Հայբիզնեսբանկի» աշխատակցի՝ Հյուսիսային պողոտայի տունը, լկտի պահվածքն ու անպատժելիությունը

«Հայբիզնեսբանկի» որոշ աշխատակիցների անվայելուչ պահվածքը թերևս ստվեր է գցում այդ ընկերության վարկանիշի վրա։ Մասնավորապես՝ խոսքը Նալբանդյան 48 հասցեում (Սախարովի հրապարակի հարևանությամբ) գտնվող գլխամասային գրասենյակի աշխատակցի մասին է։

NEWSPRESS․am-ի աշխատակիցն ականատես է եղել, թե ինչպես աշխատողներից մի երիտասարդ աչքի է ընկել իր լկտի պահվածքով։ Հաճախորդնեին սպասակելու փոխարեն՝ նա բջջային հեռախոսն ականջին, բարձրաձայն խոսել է ծանոթներից մեկի հետ՝ ցուցադրաբար պատմելով իր առօրյայի մասին ու պարծենալով Հյուսիսային պողոտայում իր ձեռք բերած բնակարանով։ Որքան էլ տգեղ է լսել ուրիշի խոսակցությունն, այնուամենայնիվ, չենք կարող չասել, թե ինչ լկտի տոնով էր երիտասարդն ասում, որ պատրաստվում է իր՝ Հյուսիսային պողոտայի բնակարանը տալ վարձով և գնալ տնփեսա, կամ որ հոգնել է աշխատանքից, մի երկու կոպեկ կտա, բժշկի թուղթ կհանի և արձակուրդային կվերցնի, որ գնա հանգստանալու։
Մի խոսքով՝ երիտասարդն իր ներքին խոհանոցը ներկայացրել է դրանով չհետաքրքրված հանրությանը։

Երիտասարդի լկտիությունը չի վրիպել նաև որոշ աշխատակիցների աչքից, ովքեր, թեև իրենց դժգոհությունն են հայտնել և զգացել, թե որքան անհարմար դրության մեջ է դնում այդ երիտասարդն աշխատակազմին, սակայն չեն սաստել նրան կամ դիտողություն արել։ Ու չի բացառվում, որ այս երիտասարդը բանկում հայտնվել է «պապայի» փողերով կամ «ծանոթ-խնամի» միջնորդությամբ՝ զբաղեցնելով իրենից շատ ավելի արժանի, գրագետ ու քաղաքակիրթ որևէ երիտասարդի տեղը։

Ու չէր խանգարի բանկի վարչակազմին մտածել այս և այս երիտասարդի նման, իրենց մասնաճյուղերում տեղ զբաղեցրած աշխատակիցների խելքը գլուխը բերելու մասին։ Հատկապես երբ տարաբնույթ հարցերով բանկ են մտնում տարբեր խավի ու ազգի ներկայացուցիչներ, և նման կեցվածքով ու «կերտվածքով» աշխատակից ունենալն առաջին հերթին պատիվ չէ բանկին և նաև տհաճ է ցանկացած հաճախորդի համար։