Հայաստանը` ՀՀԿ-ական ճահճում

Բրյուսովի անվան համալսարանի նոր ռեկտոր, ԿԳ նախկին փոխնախարար Կարինե Հարությունյանը նշանակվելով բուհի ռեկտոր՝ բուհում ոչ դրական մթնոլորտ է ստեղծել: Նախ ազատել և փոփոխել է դասախոսների հաստիքները, նաև կոլեգաների հետ շփվում է այնպես, կարծես նրանք անձամբ Կարինե Հարությունյանի ճորտերն են:

Ի դեպ, նման պահվածքը, ըստ լուրերի, հատուկ է Կարինե Հարությունյանին, ԿԳՆ-ում նույնպես նա արհամարհանքով էր շփվում նախարարության աշխատակիցների հետ:

Երկար տարիներ նա դասագրքերի շրջանառու հիմնադրամի գործադիր տնօրենն էր, և դասագրքերի հեիղնակների կողմից դժգոհություններ կային, որ իրենց մասամբ կամ ընդհանրապես չեն վճարում, սակայն ժամանակին նրանց բողոքներին ոչ ոք չարձագանքեց: Հատկապես չէր վճարվում դպրոցի ուսուցիչներին, իսկ այդ պայմաններում, երբ ծանոթ-բարեկամներով էին դասագրքերը գրում, դժվար թե դրանք որակ ունենային:

Վերադառնանք բուհին: Կարինե Հարությունյանը կրճատել էր բուհի ֆինանսատնտեսական գծով պրոռեկտորի՝ ՀՀԿ-ական Կարեն Ավագյանի եղբոր՝ Արթուր Ավագյանի հաստիքը:

Իհարկե, շատերին կթվար, թե նա մեծ գործ է արել, սակայն, ինչպես պարզվեց, նա ընդամենը նշանակվում է կրթության տեսչական մարմնի պետի տեղակալ:
Զգացվում է, չէ՞, թե որքան մոտ են ֆինանսները և կրթության տեսչությունը:

Չմոռանանք, որ Արթուր Ավագյանի անունը հիշատակվում էր՝ ավտովթարի հետ կապված, երբ նա վերցրել էր Կարեն Ավագյանի ծառայողական մեքենան և մեծ արագությամբ Սևանի ճանապարհով Երևան ընթանալիս՝ վթարի էր ենթարկել հետիոտնին:

Արթուր Ավագյանի փոքրիկ դրվագից կարելի է հետևություններ անել: Նախ իշխանություններն իրենց մարդկանց նշանակում են որտեղ ուզում են և ինչպես ուզում են, վթարների իշխանական մերձավորներն անպատիժ են, և իշխանությունները ցանկացած ոլորտի վրա պարզապես թքած ունեն, եթե ֆինանսիստին նշանակում են կրթության ոլորտում. մարդ, ով ոլորտից բացարձակապես չի հասկանում:

Այսինքն` վարչապետ Կարեն Կարապետյանն Արթուր Ավագյանին նշանակելով կրթության ոլորտում` ապացուցում է, որ նա, բացի շոուներից, ոչինչ չի անում, երբ վարվում է այնպես, ինչպես բոլոր ՀՀԿ-ականները:

Գոնե շոուն շոու լիներ. արդեն ոչ ոք Կարեն Կարապետյանին և նրա ինչ-որ փոփոխությունների տեսությանը չի հավատում:

Իշխանությունները պոպուլիստական հայտարարություններով փորձում են հանրությանը համոզել, որ թունելի վերջում լույս կա, սակայն արդեն պարզ է, որ երկիրը ճահճի մեջ էր և է:

NEWSPRESS.am