Կառավարությունս նախագահականիդ վնաս չէ

Այսօր գործադիրը հավանություն տվեց «Կառավարության կառուցվածքի և գործունեության մասին» ՀՀ օրենքի նախագծին։

Նշենք, որ կառավարությունը կազմված է լինելու վարչապետից, առաջին փոխվարչապետից, երկու փոխվարչապետերից և նախարարներից․ կառավարությունը համարվելու է կազմավորված, եթե նշանակվել են կառավարության անդամների առնվազն 2/3-ը:

Կառավարության կառուցվածքում ընդգրկվելու է 18 նախարարություն, կառավարության անդամները երդվելու են, կառավարության նիստերը դռնփակ կանցկացվեն, մի մասը՝ դռնբաց:

Ի դեպ, նշվում է, որ կառավարության գործունեության թափանցիկությունն ապահովելու համար նախատեսվում է, որ վարչապետը պարտավոր է ապահովել հանրությանը կառավարության գործունեության վերաբերյալ տեղեկատվության փոխանցումը:

Վերջին պարբերությունը հետաքրքիր է՝ ինչպե՞ս է վարչապետն ապահովելու գործունեության թափանցիկությունը, միգուցե մամուլի հաղորդագրությունների միջոցո՞վ, որի դեպքում ներկայացվելու է միայն այն, ինչ պետք է ներկայացվի, ոչինչ ավելին։

Այսինքն՝ օրենքի այս նախագիծը համահունչ է ներկայումս ՀՀ նախագահականի տրամաբանությանը և ոգուն։

Ակնհայտ է, որ ամեն ինչ արվում է Սերժ Սարգսյանի հետագա պաշտոնավարման համար, և կառավարության հետագա գործունեությունը հարմարեցվում է նախագահականի գործունեությանը․ նախագահի անվան փոխարեն գրվելու է պարզապես վարչապետ։

Եվ այս ամբողջ շրջապտույտը, Սահմանադրությունը ծվատելը՝ փոփոխությունների, միտված էր միայն մեկ նպատակի՝ Սերժ Սարգսյանը պաշտոնավարի ևս մեկ ժամկետ։

Մնում է ազգովի աղոթել Սերժ Սարգսյանի առողջության համար, քանի որ հանուն նրա այսքան տառապանքների միջով են անցնում Սահմանադրությունը, հանրությունը, երկիրը, նման նախագահին պահել է պետք հավիտյանս հավիտենից։ Իսկ հերթական նախագահի աթոռը պարզապես հեղինակության հարց է, նաև՝ ներքին պայմանավորվածությունների, հակառակ դեպքում՝ Արմեն Սարգսյանին հեռավոր Մեծ Բրիտանիայից չէին բերի Հայաստան, որտեղից արդեն տարիներ առաջ հեռացել էր ամենայն արագությամբ։

Երևի անկախությունից հետո քաղաքական պայմանավորվածությունները նման բարձր մակարդակի չեն եղել, ինչպես այժմ․ նախագահից՝ վարչապետ-նախագահ, հեռավոր Մեծ Բրիտանիայից՝ նախագահ։

NEWSPRESS.am