Սխալ է կարծել, թե ֆեյսբուքյան սահմանափակումները կարող են վատ լրատվական կայքերին հանել դաշտից․ մեդիափորձագետ

Այս պահին Ֆեյսբուքը Հայաստանում թիվ 1 սոցցանցն է։ Այդ մասին «Անդրադարձ» մամուլի ակումբում լրագրողների հետ հանդիպմանն ասաց ՏՏ անվտանգության փորձագետ Սամվել Մարտիրոսյանը։

Անդրադառնալով Ֆեյսբուքի հնարավոր սահմանափակումներին՝ նա նշեց, որ այս ցանցը մարդիկ հիմնականում օգտագործում են իրենց ազ-ատ խոսքի արտահայտման համար։

«Մարդկանց զրկել ազատ խոսելու հնարավորությունից, միայն նրա համար, որ նրանք ինչ-որ մի բան էնպես չեն ասում՝ սխալ է»,-կարծում է Սամվել Մարտիրոսյանը, ում գնահատմամբ, Ֆեյսբուքն աստիճանաբար բարդանում է, և շատերն արդեն սկսկում են նույնիսկ «գլուխ չհանել»։

Նա նկատում է, որ այս առումով «Օդնոկլասսնիկն» ավելի մատչելի, պարզ ու հասանելի է, և այն բացվում է նույնիսկ ամենահասարակ հեռախոսի վրա։

«Հաճախ մարդիկ սոցցանց մտնում են մենակ չմնալու համար, և այս դեպքում կարևորը շրջապատն է։ Եթե ինչ-որ մի հատված գնում է ֆեյսբուք, ապա նրանք պարզապես մտնում են շփվելու համար։ Բայց «Օդնոկլասսնիկը» մեզ համար մնում է որպես լուրջ հարթակ, քանի որ տարբեր երկրներում բարեկամներ ունեցողները հենց այս ցանցով են շփվում»,-ասում է փորձագետը։

Նա նշում է նաև, որ շատերին թվում է, թե Ֆեյսբուքում հասարակական-քաղաքական քննարկումներ են գնում միայն, բայց ուսումնասիրությունները ցույց են տվել, որ միջին հաշվով օգտատերն ամսվա կտրվածքով մի քանի «լայք» է դնում ու մեկ-երկու կիսումներ անում։ Սամվել Մարտիրոսյանի խոսքով՝ շատերի համար ամեն դեպքում Ֆեյսբուքը լրատվության համար մնում է մի տեսակ թիվ մեկ հարթակ։ Եվ չնայած դրան՝ Ֆեյսբուքի հնարավորությունները սահմանափակվելու են զուտ նրա համար, որ այնտեղ հիմնականում լրահոս է։

Ուսումնասիրությունները ցույց են տվել, որ այն մարդկանց մոտ, ովքեր Ֆեյսբուքում լուրեր են կարդում ամբողջ օրը, տրամադրության անկում է նկատվել, իսկ ովքեր իրար հետ են շփվում, հակառակը՝ տրամադրությունը բարձրանում է։ Ու հենց սա է պատճառը, որ ուզում են մարդկանց պահել ընկերների շրջապատում ու ազատել լրատվական գաղջից՝ ինչպես ասում են»,-նշում է փորձագետը՝ նշելով, որ սա, իհարկե, հայկական լրատվամիջոցների համար հարված է։

«Շատ լրատվական կայքերի հիմնական այցելությունների 90 տոկոսը գալիս է հենց Ֆեյսբուքի միջոցով, այսինքն՝ այն կայքի մասին, որ իմանում են Ֆեյսբուքից, այլևս չեն իմանա, իսկ մյուսների հանրայնությունը կընկնի»,-ասում է նա։

Մարտիրոսյանը նաև նկատում է, որ սխալ է կարծել, թե ֆեյսբուքյան սահմանափակումները կարող են վատ լրատվական կայքերին հանել դաշտից։

«Այնպես, ինչպես Ֆեյսբուքն է բացատրում, թե ինչպես է պահելու կայքերը, ավելի շատ այն կարծիքին եմ, որ հակառակն է լինելու»։