Ակցիզային հարկը Հայաստանում ցածր հարկերից մեկն է. Վ. Արամյան

Այսօր կառավարության նիստից հետո լրագորղների հետ զրույցում ՀՀ ֆինանսների նախարար Վարդան Արամյանն անդրադարձել է հարկային օրենսգրքին: Նա նշել է, որ ակցիզային հարկի դրույքի բարձրացման ազդեցությունը գների վրա գնահատված է 0.5 տոկոսային կետով:

Նախարարի խոսքով՝ այստեղ հարկային գործիքով որևէ արտոնություն, կամ գների վրա ազդման հետ կապված մանիպուլյացիաներ անելը ճիշտ չէ.

«Հարկը ճիշտ գործիքը չէ, որպեսզի մենք կարողանանք սոցիալապես անապահով, կամ խոցելի խմբերին օժանդակություն տանք:

«Հարկային օրենսգրքի մեջ կային նաև թուլացումներ, այնպիսի մոտեցումներ, որ տնտեսվարող սուբյեկտներին հնարավորություն էր տալիս ավելի արդյունավետ կառավարել իրենց կանխիկ հոսքերը, բնականաբար, դա բյուջեի վրա առաջացնելու էր ծանրաբեռնվածություն»,-ասել է  Արամյանը:

Նա նաև նշել է, որ չեն խրախուսում այն մոտեցումը, որ պարտքի միջոցով ընթացիկ ծախսեր արվեն, հետևաբար՝ դրվել է մոտեցում, որպեսզի հասկանան, թե որ հարկատեսակների հաշվին պետք է բալանսավորել: Կա երկու ընդունված մոտեցում՝ ուղղակի բարձրացնել հարկատեսակները, սակայն դրանք առանց այն էլ բարձր են, երկրորդ՝ սպառումը հարկել, իսկ սպառման հարկման լավագույն գործիքակազմը ավելացված արժեքի հարկերն են:

«Եթե դուք համեմատություն կատարեք՝ ակցիզային հարկը Հայաստանում ցածրերից մեկն է տարածաշրջանում: Վրաստանում ակցիզային հարկը գրեթե երկու անգամ բարձր է»,- հայտնեց Վարդան Արամյանը: