ԵՊՀ-ի ուսանողներն ու դասախոսները զուգարանի թուղթ նվիրաբերեցին մայր բուհին (լուսանկարներ)

ԵՊՀ ուսանողներն ու դասախոսները զուգարանի թուղթ էին հավաքում ԵՊՀ գրադարանի դիմաց։ Ակցիան կազմակերպել էր ԵՊՀ Restart նախաձեռնությունը։ Ուսանողների կողմից ստեղծված նախաձեռնության նպատակն է թե՛ ուսանողների, թե՛ դասախոսների, թե՛ համալսարանի ադմինիստրացիայի համար ավելի հարմարավետ, ավելի լավ, կրթական առումով ավելի առաջադեմ համալսարան ունենալը:

Նախաձեռնության անդամների առաջին ակցիան կապված է հենց զուգարանի թղթի խնդրին։ NEWSPRESS.am-ի հետ զրույցում Restart նախաձեռնության անդամ, Միջազգային հարաբերությունների ֆակուլտետի ուսանող Միհրանը մանրամասնեց, թե ի՞նչ նպատակ ունի այսօրվա ակցիան։

«Restart նախաձեռնության նպատակն է՝ բարելավել ուսանողների կրթական մակարդակը, բարձրաձայնել ուսանողական խնդիրների մասին, իրականացնել ակցիաներ, որի ժամանակ ուսանողները կարտահայտեն իրենց դժգոհությունն ու խնդիրների մասին։ Շատերի համար ծիծաղելի է այս ակցիան, սակայն խնդիրն առաջնային է ու լուրջ։ Բարձրագույն ուսումնական հաստատությունում առաջնայինը սանիտարահիգիենիկ պայմաններն են, որ պիտի ապահովված լինեն։  Պետք է բարելավվեն սանիտարահիգիենիկ պայմանները։ Մեր ակցիային միացել են ուսանողներն ու դասախոսները»։

Ակցիայի մասնակից ուսանողներն իրենց հետ բերում էին զուգարանի թուղթ։ Ակցիային ներկա էին նաև մի շարք դասախոսներ, ովքեր նույնպես բերեցին զուգարանի թղթեր ու այդկերպ իրենց բողոքն ու աջակցությունը հայտնեցին ուսանողներին։

Restart խմբի անդամները նշեցին, որ եթե այս խնդիրները լուծում չստանան, ապա ակցիաները շարունակական բնույթ են կրելու։ Ուսանողները նշեցին նաև, որ առաջիկայում անդրադառնալու են ԵՊՀ գրադարանի, գրքերի ու այլ խնդիրներին։