Հայաստանում սննդի անվտանգության ոլորտը բարձիթողի վիճակում է․ սննդագետ

Հայաստանի ավանդական խոհանոցի բաղադրիչները՝ հատիկեղենը, լոբազգիները, մածունը, կարմիր գինին, որոնք ի տարբերություն արագ սննդի մեջ օգտագործվողների՝ չեն նպաստում օրգանիզմի արագ ծերացմանը, առողջարար են։ Այս մասին այսօր լրագրողների հետ հանդիպման ժամանակ ասաց ՀՀ ԳԱԱ Էկոկենտրոնի սննդի շղթայի ռիսկերի գնահատման կենտրոնի ղեկավար, պարենային իրավունքի փորձագետ Դավիթ Պիպոյանը՝ միաժամանակ ավելացնելով, որ այսօր Հայաստանը դարձել է վատագույն սննդակարգ ունեցող երկրներից մեկը։

Նա խոսեց նաև կիսաֆաբրիկատների մասին, նշեց, որ կիսաֆաբրիկատները կամ ֆաստ ֆուդ կոչվածն արագ է պատրաստվում, չի պահանջում լուրջ խոհարարական մոտեցում և որևէ մասնագիտական կրթություն․ «Նույն մարդը հիմնականում և՛ սեղան է մաքրում, և՛ սպասարկում է, և՛ աննշան պրոցեսներ իրականացնելով՝ կարողանում է այդ սնունդը մատուցել»։

Դ․ Պիպոյանը չբացառեց, որ արագ սննդի կետերում օգտագործվող սննդամթերքն ունի երկար պիտանելիության ժամկետ, իսկ նման մթերքը պարունակում է մեծ քանակության սննդային հավելումներ, որոնք ևս օրգանիզմի համար վնասակար են։

Մասնագետը շեշտեց, որ սննդի ոլորտում պետական հոգածությունը բացակայում է, քանի որ կարագի թանկացման դեպքում տնտեսվարողները սննդի մեջ օգտագործելու են ավելի էժան և անորակ բուսայուղ, տրանսճարպեր, սփրեդներ, մարգարիններ։

«Իտալիայում ապրանք կեղծելու համար մարդուն կարող են ցմահ ազատազրկել, իսկ Հայաստանում ոլորտը բարձիթողի վիճակում է»,- շեշտեց Դավիթ Պիպոյանը։