Դինա Ակոպովնան այս պահին փախուստի մեջ է, իսկ նա ազատ «շրջում է» Հայաստանում (ֆոտո)

ԱՄՆ-ն վիզաների խարդախության մեջ մեղադրվող հայաստանցի Դիանա Գրիգորյանի նկատմամբ հետախուզում է հայտարարել։ Նշենք, որ Դիանա Գրիգորյանից բացի, ԱՄՆ Արդարադատության նախարարությունը մուտքի արտոնագրերի հետ կապված խարդախությունների և փողերի լվացման համար փնտրում է Ստելլա Բոյաջյանին և Հրաչյա Աթոյանին։

Չեղարկվել է Ակոպովնայի՝ ԱՄՆ մուտքի արտոնագիրը, բացի այդ, նրան սպառնում է 20 տարվա ազատազրկում։

Դժվա՞ր է արդյոք հայտնաբերել Դիանա Գրիգորյանին կամ որ նույնն է Դինա Ակոպովնային: Դժվար չէ՝ նա հանդիսավար է, ակտիվորեն աշխատեցնում է ֆեյսբուքյան իր էջը և նրան գտնելը դժվար չէ։

Նա նաև ակտիվ գրառումներ է կատարում․ օրինակ՝

«Ի՞նչ էլ պատահի այս կյանքում, պետք է լինես ինքնավստահ, հավատաս կյանքին, հավատաս վաղվա օրվան, հավատալ այն ամենին, ինչ անում ես ու հավատում աստծուն…»։

Հաղորդավարուհին նաև գովազդում է համալիրը, որտեղ աշխատում է, հրավիրում մասնակցելու շոու ծրագրի, նույնիսկ հեռախոսահամար թողնում:

Այսինքն՝ նրան գտնելը դժվար չէ, իսկ թե ինչու է նա ազատ շրջում Երևանում՝ այն դեպքում, երբ ԱՄՆ-ն հետախուզում է հայտարարել նրա նկատմամբ, անհասկանալի է։

Ի դեպ, իր ֆեյսբուքյան էջն ակտիվ պահելով՝ նա նաև ծաղրում է ՀՀ իրավապահ համակարգը՝ տեղադրելով հանդիսության սրահներից լուսանկարներ և մարդկանց հրավիրելով միջոցառումների։

NEWSPRESS.am-ին ՀՀ ոստիկանության լրատվական ծառայությունից Դիանա Գրիգորյանի հետախուզման առնչությամբ փոխանցեցին.

«ԱՄՆ իրավապահների կողմից պաշտոնական տեղեկատվություն չունենք այս պահի դրությամբ»։