Լոռու մարզում ուժեղ քամու հասցրած վնասների չափերը դեռ ճշտվում են

Լոռու Մարզում տեղի ունեցած  նոյեմբերի 12-ի ուժեղ  քամու հետքերը  դեռևս չեն մաքրվել:

Վնասների չափի ամբողջական տվյալների մասին դեռ վաղ է խոսել: Նախնական տվյալներով առավել շատ վնասներ են կրել Թումանյանի, Ստեփանավանի տարածաշրջաները և Վանաձոր քաղաաը: Գրանցվել են տանիքների փլուզումներ, արմատախիլ են եղել ծառեր, իսկ Էլեկտրական սյուների վնասների հետևանքով առաջացել են  հրդեհներ: Մեծ հաշվով հրդեհներից տուժել է Թումանյանի շրջանը, որտեղ գրանցվել է հրդեհի ութ դեպք: Ինչպես նաև մարզի 7 քաղաքային և 83 գյուղական համայնքեր հոսանքազրկվել են: Լոռու մարզպետ Արթուր Նալբանդյանը, պատկան մարմինների մասնակցությամբ, արտակարգ խորհրդակցություն է  հրավիրել աղետի հետևանքները կարճ ժամանակամիջոցում վերացնելու հարցերի շուրջ:

ԼՄ փրկարարական վարչության ճգնաժամային կառավարման կենտրոնի համակարգչային օպերատոր Անի Հարությունյանը newspress.am-ի հետ հեռախոսազրույցում ասաց. «Հայէլէկտրացանցեր ընկերության Դեբեդ մասնաճյուղի» ընկերության բրիգադները աշխատել են ողջ գիշեր և մինչև առավոտ հոսանքազրկված համայնքներից 43-ում էլեկտրամատակարարումը վերականգնվել է»: Նրա խոսքով` այս ուղղությամբ աշխատանքները շարունակվում են:

Նշենք, որ վնասներն արագ վերականգնելու նպատակով բրիգադներ են ժամանել նաև Երևանից:

Վանաձորի թիվ 2 հրշեջ փրկարարական ջոկատի հրամանտար, փրկարար  ծառայության փոխգնդապետ Հովիկ Սահակյանը newspres.am-ի թղթակցի հետ զրույցում հայտնեց, որ 72 քառ.մ տանիքներ են շրջվել: Դրանց վերականգնողական աշխատաներն սկսվել են նոյեմբերի 13-ի վաղ առավոտից:

Լոռու մարզպետի հանձնարարականով ստեղծվել են հանձնաժողովներ` վնասի չափերը ճշտելու նպատակով:  Այդ տվյալներն առաջիկայում կներկայացվեն կառավարությանը: Իսկ մինչ այդ,  հնարավորությունների սահմաններում արագ, կմաքրվեն  փողոցները և կվերանորոգվեն  բազմաբնակարանանոց շենքերի տանիքները`  քանի դեռ տեղումներ չկան:

Արմինե Մկրտումյան