Սահմանամերձ Ջանֆիդայի բժշկուհին չի բարեհաճում նույնիսկ հիվանդների զանգերին պատասխանել, ուր մնաց տուն գնա (լուսանկարներ)

Արմավիրի մարզի Ջանֆիդա գյուղի բնակիչներն ահազանգում են. գյուղի ամբուլատորիայի բժշկուհի Վարդուհի Բարեյանն իրենց կանչերին չի արձագանքում:

Գյուղի բնակիչները NEWSPRESS.am–ի զրույցում պատմեցին, թե ինչպես իրենց համագյուղացին զանգահարել է և ասել, որ որդին ջերմություն ունի, իսկ բժշկուհին այց կատարելու փոխարեն՝ ասել է, թե իր մոտ բերեն տղային: Նեղսրտած հայրն, այնուամենայնիվ, ինքն է որդուն տարել բժշկուհու մոտ: Պատմում են, որ Վարդուհի Բարեյանն այդ տղային մասնագիտական օգնություն չի ցուցաբերել և ուղղորդել է նրան տանել հիվանդանոց, քանի որ ինքն անելիք չունի:

Ընդհանրապես, գյուղի բնակիչներն ասում են, որ բժիշկը սրտացավորեն չի մոտենում իր գործին ու իրենց զանգերին էլ չի պատասխանում:

Թե՛ այս վերոհիշյալ դեպքի, թե՛ բնակիչների ահազանգերի մասին հստակ տեղեկություններ ստանալու համար փորձեցինք կապ հաստատել հենց Բարեյանի հետ: Վաղ առավոտից կատարած մեր բազում զանգերն արդյունք չտվեցին: Վարդուհի Բարեյանի հեռախոսին կամ զանգ գնում էր, նա չէր պատասխանում, կամ էլ զբաղված էր ցույց տալիս: Այսինքն՝ ճիշտ այնպես, ինչից էլ հենց դժգոհում էին գյուղի բնակիչները:

Ի վերջո, մեզ հաջողվեց կապ հաստատել Բարեյանի ամուսնու՝ Հայկ Առաքելյանի հետ: Ներկայացանք՝ որ լրատվամիջոցից ենք, ինչին ի պատասխան՝ նա շփոթված հարցրեց, թե ինչ է պատահել: Իմանալով, որ իր տիկնոջը զանգահարել ենք և նա չի պատասխանել՝ Առաքելյանն ասաց.

«Հեռախոսը լավ չի աշխատում, պետք է տանենք սարքելու: Չի կարողանում զանգերին պատասխանել»:

Խնդրեցինք Առաքելյանին փոխանցել իր տիկնոջը՝ կապ հաստատել մեզ հետ: Նա ասաց, որ անպայման կփոխանցի: Ուղիղ 5 րոպե անց՝ չսպասելով, թե երբ նա կփոխանցի կնոջը մեր խնդրանքը, մենք ինքներս զանգահարեցինք բժշկուհուն: Նա անմիջապես պատասխանեց զանգին:

Վարդուհին ցածր ու նվաղած ձայնով ասաց, որ եղել է ատամնաբույժի մոտ, դրա համար էլ չի պատասխանել մեր զանգերին, իսկ հեռախոսի անսարքության մասին ոչինչ չհիշատակեց: Հավանաբար, նա չէր հասցրել իմանալ, թե ամուսինն իր համար ինչ արդարացնող փաստ էր ներկայացրել: Ու ստացվեց այնպես, որ ամուսինների խոսքը չհամընկավ: Մեկնաբանությունները թողնում ենք ընթերցողին…

Բժշկուհուն ասացինք նաև, որ բազմաթիվ ահազանգեր ենք ստացել. գյուղացիները դժգոհ են նրա աշխատանքից: Վարդուհի Բարեյանը նախ նկատեց, որ ինքը պարտավոր չէ այցելել հիվանդին, ապա, չգիտես ինչու, հարցրեց.

«Իսկ ովքե՞ր են բողոքել, կասե՞ք »:

Դե իհարկե, եթե Հիպոկրատի երդում տված բուժաշխատողին հետաքրքրում է, թե ովքեր են բողոքել, այլ ոչ թե ինչու կամ ինչից, պարզ է դառնում արդեն, որ նրա մոտեցումն իր համագյուղացիներին անբարեխիղճ է:

Ի դեպ, մենք առաջարկեցինք նրան այցելել իրենց գյուղ և հանդիպել իրեն՝ հարցազրույցի համար, սակայն նա ասաց, որ շաբաթ-կիրակի օրերին իրենք չեն աշխատում:

Ստացվում է, որ աշխատանքային օրերին գյուղացիներին պատշաճ չեն սպասարկում, իսկ հանգստյան օրերին պարզապես մարդիկ հիվանդանալու իրավունք չունեն, քանի որ, Աստված չանի, հիվանդությունները դժբախտ վախճան կունենան:

Եթե ընդամենը 850 ընտանիք ունեցող գյուղի բժշկուհին պատճառաբանում է, թե չի հասցնում կամ պարտավոր չէ բոլորին այցելել, ապա հարկ ենք համարում բերել մայրաքաղաքի բազմահազարանոց բնակչության օրինակը, որտեղ բժիկներն առանց տրտնջալու տնայցեր են կատարում՝ ամեն օր արձագանքելով մի քանի տասնյակ կանչերի: Ի դեպ, մեզ հասած տեղեկություններով, Վարդուհի Բարեյանն ու նրա ամուսինը նաև ընտանեկան բիզնես ունեն՝ դեղատուն են աշխատեցնում և գուցե առևտրով ընկնելով է, որ բժշկուհին ժամանակ չի ունենում հույսն իր վրա դրած հիվանդներին այցելելու:

Ուստի բոլոր բժիշկ դառնալ ցանկացողներին կարելի գլխի գցել, որ Հիպոկրատի երդում տալուց առաջ մի լավ կշռադատեն, թե ինչի են գնում, իսկ Արմավիր մարզպետարանի առողջապահության վարչությանն էլ կխնդրենք ուշադրություն դարձնել Ջանֆիդա գյուղում աշխատող իրենց կադրի մասնագիտական ու որակական հատկանիշներին: