Արա Աբրահամյանը «դաբրոն» տվեց. Սերժ Սարգսյանն արդեն «կարող» է վարչապետ դառնալ (տեսանյութ)

Այսօր հայաստանյանյան մեդիադաշտում լայն տարածում գտավ Ռուսաստանի հայերի միության նախագահ Արա Աբրահամյանի հարցազրույցը «Tonight with Mike Sarian» հաղորդման շրջանակում:

Արա Աբրահամյանը, ի թիվս շատ այլ թեմաների, ընդգծված կերպով անդրադարձ կատարեց մեր երկրի քաղաքական անցուդարձին: Կարծիք, իհարկե, չէր էլ կարող լինել, որ Արա Աբրահամյանն իր ցոփ ու շվայտ կյանքի բարձունքից կարող է խոսել հասարակ հայ քաղաքացու կենցաղից, ունեցած խնդիրներից, դարդ ու ցավից, նա միայն կարող էր ողջունել Սերժ Սարգսյանի յուրաքանչյուր որոշում և առանց վերապահումի դրանք որակել տվյալ ժամանակի միակ ճիշտ որոշումը:

Արա Աբրահամյանն իր հարցազրույցում արդեն իսկ բացեց փակագծերն այն մասին, որ Սերժ Սարգսյանը միանշանակ զբաղեցնելու է վարչապետի պաշտոնը, փոխվարչապետն էլ Կարեն կարապետյանն է լինելու: Նա ողջունեց այդ վերադասավորումը, ինչպես նաև, այսպես ասած, մոմեր վառեց նա Արմեն Սարգսյանի ոտքերի տակ՝ սրբադասելով վերջինիս՝ «միջազգային կարգի մենեջեր է, շատ պատրաստված, իրոք կարելի է սպասել հրաշքների»:

Արա Աբրահամյանը չկորցրեց պատմական շանսը և ևս մեկ անգամ «փառք ու պատիվ մեր իշխանություններին» պաթոսախառը խոսք հղեց: Այսպիսով՝ նա կարճ, բայց գործուն ճանապարհ հարթեց իր համար Հայաստանի բոլոր իշխանական օղակների հետ լավ հարաբերություններ ունենալու հարցում՝ լինի դա Արմեն Սարգսյան, Կարեն Կարապետյան, թե Սերժ Սարգսյան:

NEWSPRESS.am