Գարաժում մի հատ էլ հին ժիգուլի ունեմ, կուզե՞ք դրա նկարն էլ տամ, դնեք. Ջանֆիդայի անբարեխիղճ բժշկուհու ամուսնուն միայն իր նկարն է հուզում

Օրերս NEWSPRESS.am-ն անդրադարձել է Արմավիրի մարզի Ջանֆիդա գյուղի բժշկուհի Վարդուհի Բարեյանի անբարեխիղճ աշխատանքին։ Համենայնդեպս, մեզ ահազանգել էին մի շարք ջանֆիդացիներ, ովքեր դժգոհում էին բժշկուհու վերաբերմունքից։ Մասնավորապես՝ մատնանշում էին, որ նա իրենց զանգերին չի պատասխանում, իսկ ծանր հիվանդությունների դեպքում էլ երբեք տնայց չի կատարում։

Ասում են, որ բժշկուհու կամայականությունը հասնում է նրան, որ վերջինս ընդհանրապես չի էլ լինում աշխատավայրում, իսկ երբ բուժքույրերից խնդրում են բժշկուհու հեռախոսահամարը, նրանք այն չեն տրամադրում հիվանդներին՝ պատճառաբանելով, թե իրենց խստիվ արգելվել է հեռախոսահամար տրամադրել։

Նյութի առաջին հրապարակման օրը մենք զանգահարեցինք բժշկուհուն, սակայն նա մեր զանգին ևս չպատասխանեց։ Սա արդեն իսկ ինչ-որ չափով խոսուն սկիզբ էր այն մասին, որ բնակիչներն իրավացի են։

Վերջապես մեզ հաջողվեց ամուսնու միջոցով կապ հաստատել Վարդուհի Բարեյանի հետ․ նախ մեզ ասացին, որ հեռախոսը լավ չէր աշխատում, հետո ասացին՝ թե չի լսել զանգը, հետո էլ ասացին, թե բժշկուհին իբր եղել է ատամնաբուժի մոտ և չի կարողացել պատասխանել։

Այլ կերպ ասած՝ բժշկուհին ու իր ամուսինը՝ Հայկ Առաքելյանը, մեզ հետ զրույցում կարծես ինքնապաշտպանության էին դիմում ու փորձում արդարանալ այն դեպքում, երբ մենք նախահարձակ չէինք եղել։

Այս նյութի հրապարակումից հետո եղան բազում արձագանքներ։

Շատերը մեզ գրեցին ու զանգահարեցին՝ նշելով, որ տեղեկատվությունը հստակ է, և բժշկուհին իսկապես թերանում է իր աշխատանքում։ Բայց ամենազավեշտալի և անտրամաբանական արձագանքը եղավ բժշկուհու ամուսնու՝ Հայկի զանգը։

Վերջինիս չէր անհանգստացրել այն, որ այս հրապարակումն ամբողջությամբ սև բիծ է իր կնոջ հեղինակության վրա, և նրան ամենևին չէր անհանգստացնում այն, որ իր կնոջից գրեթե ամբողջ գյուղը դժգոհում է։ Նա չէր զանգահարել ասելու, թե ինչու ենք նման նյութ հրապարակել։ Հայկի խնդիրն այն էր, թե ինչո՞ւ ենք մենք իր նկարը դրել կայքում։

«Իսկ ո՞վ է Ձեզ թույլ տվել իմ նկարը քաշեք, դնեք…. գարաժում մի հատ էլ հին ժիգուլի ունեմ, կուզե՞ք դրա նկարն էլ տամ, դնեք»,-ասաց նա։

Այս դեպքում երկուսից մեկը՝ կամ նա հասել է ցինիզմի գագաթնակետին ու, չգիտես ինչ հիմքերով նրա մոտ «բեսբրիդելային» տրամադրություն է, և կամ էլ, ինչպես փորձն է ցույց տալիս, լուսանցքային դատողությունները հատուկ են թերուս մարդկանց։

Ինչ վերաբերում է Հայկի՝ 93 թվականի «Ժիգուլու» լուսանկարին, ապա ավելի լավ կլիներ՝ նա մեզ տրամադրեր իր նոր՝ արտասահմանյան մակնիշի ավտոմեքենայի լուսանկարը և բացատրեր, թե այդ ի՞նչ ճանապարհով է նրան հաջողվել ձեռք բերել ավտոմեքենան՝ հիվանդներից վերցրած գումարների՞, թե՞ դեղատնից ստացած հասույթի շնորհիվ։

NEWSPRESS.am