18+ զրույց վարչապետի հետ

Արմինե Մելքոնյանը ֆեյսբուքյան իր էջում գրել է

«18+ զրույց վարչապետի հետ

Հիշո՞ւմ եք էն մեր գյուղի Ռշտունին: Էն որ տնով-տեղով գնաց երկրից: Գյուղում ասում են, թե դրանցից խեր-խաբար չկա…. Իսկ ո՞ր գնացողից կա:

Մի քանի օր առաջ իրիկունը գյուղ գնացինք, ոնց փոշմանեցի…. Ցերեկը գյուղի տխրությունը չի երևում… Գիշերը մատնում է իրականությունը… 4 մուտք ունեցող հինգհարկանի շենքից հատուկենտ լույսեր էին ծիկրակում:

Մնացյալ լույսերի լռությունը այնքան տխրություն էին ամփոփում իրենց մեջ….

Տխրեցի… Հիշեցի, որ 17 տարի առաջ հայրս էլ գնաց օտար հող ու հետո եղբայրս, հետո մայրս….

Նայեցի հերանցս տան պատուհանին, մանկությունս լուսնի շողերով պատկեր էսքիզեց մեր պատուհանին ու նույն վայրկյանին էլ անէացավ….

Գնում են շատերն ու նույն Ռշտունենց տնեցիքի նման էլ հարցնող էլ չի լինում…

Ասում ես աշխարհի դարդը հո ինձ չե՞ն տվել… երևի ճիշտ ես….

Բայց ախր էս աշխարհն իրոք մի տեսակ ծուռն է… Դրախտում ծնվում ես, խնձորն էլ չճաշակած օձերի ձեռքով դրախտից վտարվում ես… Բա սա արդա՞ր է…

Սամվելիցս պատմե՞մ….

Արդեն քանի օր բրիգադ է ման գալիս, թե որ հետները Ռուսաստան գնա…

Ասում ես տխուր եմ…

Տխուր չեմ, վախն է, որ չգիտեմ, թե աչքերս ոնց արտացոլեն, ու թվացյալ տխրության շղարշ են հագնում….

Բա որ գնա, տեսնի ապրելը այնտեղ հեշտ է, ասի երեխեքին վերցրու ու արի….

Բա գնացածների տները փոշուց ո՞վ է մաքրելու…

Բա գոնե վարձով տները փոխելուց տների պատերի հետ կռիվ եմ տալիս, ուզում եմ խոսեն, պատմեն գնացողներից…. ու լռում են…

Հա… կասես թե էլի դժգոհ ես….

Մի օր վեր կաց արի ժողովրդի մոտ, առանց քո փողկապավոր քարավանի…. արի լսի էս բանվոր ժողովրդին…. միայն լսի… Ժողովուրդը հիմա լսողի պակաս ունի… էն մայր ու աղջիկն էլ դրա պակասից նետվեցին կամրջից….

Էլի նեղանում ես, թե էնպիսի վերնագիր եմ դրել, որ մանիպուլյացիայի ենթարկեմ…

Ճիշտ ես , 18+ չէր, այլ կեսգիշերն անց ու 30-ից հետո….»: