Քաղաքապետարան․ Կամո Արեյանը որոշել է խուզարկել կանանց

Օրերս քաղաքապետարանում տեղի ունեցած կոյուղաջրի միջադեպի հետ կապված՝ Երևանի հավիտենական փոխքաղաքապետ Կամո Արեյանը որոշել է խուզարկել քաղաքապետարան ելումուտ ունեցողներին, այդ թվում՝ ԶԼՄ ներկայացուցիչներին։ Իհարկե, ենթատեքստում «Երկիր Ծիրանիի» կանայք են։
Ինչպես երևում է, քաղաքապետարանը վախեցել է կոյուղաջրից, ինչպես չէր վախենա սատանայից․ ի դեպ, սատանայի հետ հնարավոր է բանակցել, սակայն կոյուղաջրի հետ՝ դժվար։

Երևի քաղաքապետարանում զգուշանում են, որ հաջորդ անգամ ոչ թե բանկայով կոյուղաջուր, այլ բաց կոյուղագիծը կբերեն քաղաքապետարան, կամ որ ավելի վատ՝ այն թերի կամ չկատարած աշխատանքները, որոնք քաղաքապետարանը չի կատարել, կամ կատարել է կիսատ-պռատ, այդ թվում նաև՝ կոյուղագծերը։

Կամո Արեյանը, եթե մինչ այս Երևանի բոլոր քաղաքապետերին կրծքով է պաշտպանել, ապա Տարոն Մարգարյանին պաշտպանելու է անձնական խուզարկությամբ։ Իհարկե, սա հետընթաց է Կամո Արեյանի կենսագրականում, սակայն որոշել է, որ պետք է անվտանգության միջոցառումներ կիրառել՝ ավագանու անդամների և քաղաքապետարանի պաշտոնյաների ֆիզիկական անվտանգությունը երաշխավորելու համար. այն է, որ այլևս երբեք Երևանի կոյուղաջրերը չլցնեն քաղաքապետարանի աշխատակիցների վրա։

Ի դեպ, Կամո Արեյանը որևէ կերպ չի անդրադարձել, որ հենց այդ նույն աշխատակիցները ծեծի են ենթարկել կանանց և կենտրոնացել Տարոն Մարգարյանի անձը կոյուղահոտից փրկելու եկամտաբեր գործընթացին։

Հիմա հերթն Արեյանին է, նա է բոլոր քաղաքապետերի փրկիչը բոլոր ժամանակներում․ նա փրկում է հաշվետվությունների, ծրագրերի, կատարողականի և բոլոր դեպքերում. և եթե մինչև այս նա հոգիներն էր փրկում, հետայսու՝ մարմինները։

Նաև չմոռանանք, որ ՀՀԿ անգամ ամենանվաստ անդամները տասնյակ հազարավոր դոլար արժեցող մեքենա են վարում և երբեք հանրային կոյուղագծերի հետ գործ չեն ունեցել և ցանկություն էլ չկար առնչվելու, մինչև եկավ մինչևը․ երբ քաղաքապետարանը և կոյուղաջուրը հանդիպեցին։

Ինչպես ասում են՝ դեռևս 5-րդ դարում կանխագուշակել էին, որ Երևանի քաղաքապետարանն ինչքան էլ խուսափի, մի օր առերեսվելու է ճակատագրական կոյուղաջրին և ոչ ոք չի հաղթելու՝ ուղղակի ծանոթանալու են։

NEWSPRESS.am