«Կեցցե Ասլանյան, վիվատ»․ չկա աղբաման՝ չկա աղբի խնդիր

Վանաձորի քաղաքապետ Մամիկոն Ասլանյանը ֆեյսբուքյան իր էջում գրառում է կատարել և լուսանկարներ հրապարակել, որտեղ ցուցադրված է, թե ինչպես է քաղաքապետարանը տարածքն ազատել աղբից։

Այս նկարներին կից քաղաքապետը մասնավորապես գրել է․

«Սիրելի համաքաղաքացիներ, 6-րդ դպրոցի հարակից կաթսայատան մոտ պարբերաբար աղբի կուտակումներ են լինում, ինչը առաջացնում է բնակչության իրավացի դժգոհությունը. հայտնում ենք, որ տվյալ տարածքում աղբ թափելը խստիվ արգելվում է, աղբ թափողները կտուգանվեն…»

Առաջին տպավորությունը թերևս ողջունելի է, որի համար կարելի է նույնիսկ ծափահարել քաղաքապետ Ասլանյանին՝ «Կեցցե Ասլանյան, վիվատ»։ Բայց ինչպես արդեն նշեցինք՝ ծափերը միայն առաջին տպավորության ներքո կլինեն։

Հարկ է նշել, որ քաղաքապետի նշած տարածքում նախկինում տեղադրված էին աղբամաններ, որոնք շատ արագ լցվում էին աղբով և ժամանակին չէին դատարկվում։ Դեռ քաղաքապետ Սամվել Դարբինյանի օրոք այս հարցը բազմիցս բարձրաձայնվել է և երբեք լուծում չի ստացել։

Խնդիրն այն է, որ այս տարածքում գործում է և՛ 8-րդ մանկապարտեզը, և՛ 6-րդ դպրոցը, որոնց աղբը թափվում էր հենց այս աղբամաններում։ Այստեղ էին իրենց կենցաղային աղբը թափում նաև հարակից բազմաբնակարանների բնակիչներն ու շուկայի առևտրականները, քանի որ աղբամանները նաև քաղաքային շուկայի հարևանությամբ են։

Ժամանակին աղբանմանները դատարկելու և տարածքը մաքուր պահելու փոխարեն՝ փաստորեն քաղաքապետը նախընտրել է տարածքից աղբամանները պարզապես հեռացնելու տարբերակը․ չկա աղբաման՝ չկա աղբահեռացման խնդիր։

Բայց արի ու տես, որ հարցն այսքանով չի լուծվել։

Ոչ միայն սովորության համաձայն, այլև տարածքում այլ աղբամանների բացակայության պատճառով, մարդիկ շարունակում են աղբը թափել նախկին աղբամանների տեղում։

Ու հիմա պարոն քաղաքագլուխը փոխանակ տեղադրի նոր աղբամաններ, թեկուզև հարակից մեկ այլ տարածքում, մարդկանց սպառնում է, թե ով աղբ թափեց գետնին՝ կտուգանվի։

Այս դեպքում հարց է առաջանում, իսկ որտե՞ղ թափեն մարդիկ իրենց աղբը, եթե աղբամաններ չկան տարածքում։ Միգուցե տուգանք սահմանելուց առաջ, կարելի էր մտածել նաև այս հարցի՞ ուղղությամբ, որը թերևս կշտկեր ստեղծված իրավիճակը․ աղբը կթափվեր նախատեսված վայրում, աղբահեռացումը կլիներ ժամանակին ու մարդիկ էլ աղբի կուտակումներից չէին դժգոհի։

Ու եթե լուծվեր այս հարցը, այն ժամանակ էլ, հավանաբար, կարելի կլիներ նաև իսկապես ծափահարել քաղաքապետին՝ «ազնիվ որոշման» համար և նույնիսկ գոչել՝ «Կեցցե Ասլանյան, վիվատ»։

NEWSPRESS.am