Մինչև տարեվերջ կավարտվի հանրակացարանների սեփականաշնորհումը․ Արման Սահակյան

Հայաստանում 2018 թվականին կներդրվի էլեկտրոնային աճուրդների համակարգը։ 2019-ից կգործեն էլեկտրոնային աճուրդների մեխանիզմներ։ Այս մասին այսօր լրագրողների հետ հանդիպման ժամանակ ասաց ՀՀ կառավարությանն առընթեր պետական գույքի կառավարման վարչության պետ Արման Սահակյանը:

Արման Սահակյանը հայտնեց, որ պետական անշարժ գույքի հաշվառման գրանցամատյանում 2017 թվականին վերահաշվառվել է պետական սեփականություն հանդիսացող 8862 միավոր անշարժ գույք և պետական բաժնեմաս ունեցող ընկերությունների գույքի կազմում՝ 2705 միավոր անշարժ գույք: 2018թ. հաշվառման փաստաթղթային համակարգից անցում կկատարվի էլեկտրոնային ինտեգրացված համակարգին:

Ըստ նրա՝ 2017թ. 249 քաղաքացի (90 ընտանիք) նվիրատվությամբ կամ սեփականաշնորհման ճանապարհով իր զբաղեցրած հանրակացարանային 91 սենյակի սեփականատեր է դարձել: Մինչդեռ 2016 թվականին 177 քաղաքացի է (68 ընտանիք) 70 սենյակի սեփականատեր դարձել: Մինչև տարեվերջ 509 ընտանիք կսեփականաշնորհի իր բնակարային տարածքը։