Կրկին դրամաշնորհ՝ կրթական ոլորտին․ հերթական փորձությունը

Այսօր Ազգային ժողովում «Բարձրագույն կրթության ոլորտի օրենսդրական բարեփոխումներն ու հիմնախնդիրները» թեմայով խորհրդարանական լսումների ժամանակ կրթության վերաբերյալ իր տեսակետներն է ներկայացրել ՀՀ կրթության և գիտության նախարար Լևոն Մկրտչյանը։

Նա նշել է, որ Հայաստանի բնակչության շուրջ 51 տոկոսը ներգրավված է բարձրագույն կրթական համակարգում․ «Եթե հաշվի առնենք ստացվող ֆինանսական ռեսուրսները պետությունից, մասնավոր վճարներից, դրամաշնորհներից և այլն՝ կարող ենք ասել, որ ՀՀ-ում բարձրագույն կրթական համակարգն ամբողջ տարվա ընթացքում ստանում է այնքան ֆինանսավորում, որքան ամերիկյան առաջավոր համալսարաններից մեկի ֆակուլտետը»։

Կրթության և գիտության նախարարը կարծում է, որ նման ֆինանսական պայմաններում Հայաստանի կրթական համակարգը կարողանում է կատարել իր առջև դրված խնդիրները և համակարգի ուղենիշները։

Ներկայացվող թեմայի շուրջ Լ․ Մկրտչյանը նշեց, որ պետք է պայմաններ ստեղծել առնվազն չորս-հինգ տարվա կտրվածքով և միաժամանակ շեշտեց, որ փաստաթուղթը միջազգային փորձաքննություն է անցել, Համաշխարհային բանկն էլ ոչ հայաստանյան քվոտաներից դրամաշնորհ է տրամադրել, որպեսզի աշխարհի լավագույն փորձագետներն աշխատեն օրենքի նախագծի մշակման վրա:

«Օրենքի կարևոր մասերից մեկը 3 տարվա անցումային շրջանն է, որն անհրաժեշտ է, որպեսզի համակարգը լուրջ բարեփոխումներ կատարի»,- ասաց Կրթության և գիտության նախարարը։