Ալթունյանին տարեք, դեղերը բերեք

Հայ աղջիկների արգանդի վրա գարդասիլի փորձարկումներից հետո սահուն անցում ենք կատարում ողջ հայ ժողովրդի առողջությունը վտանգելուն կամ, առնվազն, կյանքի որակը վատացնելուն:

Առանց առողջապահության ոլորտում ապահովագրության զարգացման, բժիշկներին դիմելու, պոլիկլինիկաներից օգտվելու մշակույթը հասարակության մեջ զարգացնելու՝ մեր երկրի առողջապահական համակարգը որոշեց անցում կատարել «Դեղերի մասին» նոր օրենքին: Հայաստանում գրանցված մոտ 4700 անուն դեղից դեղատոմսով բաց թողնման ենթակա է 2700-ը: Մարտի 1-ից դեղատոմսով կվաճառվեն միայն հակաբիոտիկները, հորմոնային պրեպարատները և կոդեին պարունակող դեղերը, իսկ հուլիսի 1-ից՝ ներարկումային և հակաուռուցքային բոլոր դեղերը, արդեն հոկտեմբերի 1-ից՝ մնացած բոլոր դեղերը:

Նոր օրենքի և փոփոխությունների մասին հայտարարելուց առաջ պետք էր նախ հաշվի առնել այն հանգամանքը, որ մեր հասարակությունը դրան դեռևս պատրաստ չէ, գլխացավ ունեցող մարդը Հայաստանում չի դիմում բժշկի, և ինչպես ճիշտ մի հարց էլ բարձրացրել էր հայտնի սեքսոլոգներից մեկը.

«Ըստ դեղերի նոր օրենքի, եթե աղջիկն ունի ցավոտ դաշտան ու ամեն անգամ իբուպրոֆեն է խմում ցիկլի ժամանակ, պետք է այցելի բժշկի ասի՝ տենց մոմենտ կա ու դեղատոմս վերցնի»:

Այս և այլ մանր, բայց հասարակ քաղաքացու վրա ազդող հարցեր չեն քննարկվել կամ անուշադրության են մատնվել Առողջապահության նախարարության՝ հանձին նախարար Ալթունյանի կողմից: Հաշվի չի առնվել նաև այն հանգամանքը, որ քիչ չեն մեր հասարակությունում հատով դեղ գնող թոշակառուները կամ մարդիկ, որոնց համար ճոխություն է միանգամից մեկ տուփ գնելը:

Կարծիք կա նաև, որ այս փոփոխությունները բերելու են դեղերի ինքնարժեքի թանկացման:

Պետք է նկատել, որ նման փորձ եվրոպական տարբեր երկրներում արդեն իսկ գործում է, բայց խնդիրն այն է, որ օրենքների ոչ ճիշտ տեղայնացումն իր հետ բազմաթիվ խնդիրներ է բերում: Հայաստանն ունիկալ երկիր է, Հայաստանում աղքատության մակարդակը բարձր է, իսկ ապրելաձևն այնպիսին չէ, ինչպիսին, օրինակ, Գերմանիայում է և սա հաշվի առնելով պետք է վերանայվի օրենքը և հայ հանրության պահանջներին հարմարեցվի:

NEWSPRESS.am