Եկմալյան փողոցի լքված տնակներն ու տարածքում ավելացող աղբը (լուսանկարներ)

Եկմալյան փողոցի բնակիչների վիճակը նույնն է, ինչ Արամի ու Ֆիրդուսի փողոցների բնակիչների կարգավիճակները։ Բոլորն էլ սպասում են, թե պետությունն ինչ կորոշի, ինչ գումար կամ բնակարան կտրամադրի իրենց։ Այդ բնակիչների ճակատագրերը կապված են մի քանի մարդկանց որոշումների հետ։

Հիմա Եկմալյան փողոցում մնացել են մի քանի հողաշեն տներ, որոնցից մի քանիսը լքված են ու մատնված անտերության, իսկ մի քանիսում շարունակում են ապրել մարդիկ, ովքեր ամեն օր այդ փողոցում ապրելու համար շնորհակալություն են հայտնում Աստծուն։ Հողաշեն տնակների բնակիչները չէին ցանկանում բացել դռները, զրուցել մարդկանց հետ։ Նրանցից ոմանք էլ գտնվում էին աշխատանքի վայրում։ Այդ փոքրիկ բակը կարծես կտրված լինի ժամանակակից Երևան քաղաքից։ Բակը մեկ ոտքով կառչած է Հին Երևանից, իսկ մյուս կողմից էլ պայքարում է Նոր Երևանի դեմ։

NEWSPRESS.am-ի հետ զրույցում Եկմալյան փողոցի բնակիչը, ով հարգելի պատճառներով չցանկացավ ներկայանալ, պատմեց, թե ժամանակին ինչպիսի փողոց էր Եկմալյանը և հիմա ինչի է վերածվել։

«Ժամանակին սա քաղաքի ամենաբանուկ փողոցներից էր։ Այս հողաշեն տնակները, որոնք հիմա մի քանիսն են մնացել, ժամանակին մի քանի տասնյակ էին։ Այստեղ հիմնականում բոլորն ապրում էին վարձով և մեկ ամսվա համար վճարում էին շատ սիմվոլիկ գումար՝ 3 ռուբլի։ Այստեղ գալիս էին գյուղերից Երևան եկած մարդիկ ու սա համարվում էր Երևանի այն վայրը, որտեղ կարելի էր գտնել ամենաէժան տնակները։ Իսկ հիմա այստեղ ապրում են մի քանի հոգի, ովքեր արդեն երկար ժամանակ է, ինչ կառավարության շենքի դիմաց հավաքվում են ու ցանկանում են ստանալ իրենց հարցերի պատասխանները»։

Կինն իր բողոքը հայտնեց, որ լքված տների տարածքում աղբ են նետում հիմնականում տարածքում գտնվող բիզնես կենտրոնների աշխատակիցները։

«Եթե ցանկապատ տարածքներից ներս նայեք, ապա կտեսնեք, որ լքված տնակների բակերում ամբողջովին աղբ է լցված։ Այնպիսի տպավորություն է, որ մարդիկ արդեն կամաց-կամաց նախապատրաստվում են, որ այս տարածքը քանդվելու է։ Բավական է այստեղի շենքերում ապրել ու տեսնել, թե ինչպես են հարակից բիզնես կենտրոնների աշխատակիցներն աղբը բերում ու թափում այդ լքված տնակների բակերում։ Եթե այսպես մի քանի ամիս էլ շարունակվի, ապա այս տարածքը կվերածվի փոքր աղբավայրի։ Խնդիրը լուրջ է ու շատերի համար թվում է անլուծելի։ Չգիտեմ, թե ինչ կլինի ապագայում»։

Այդ փոքրիկ տնակներում ապրող մի քանի ընտանիքների մոտ անորոշ վիճակ է։ Մարդիկ գրում են նամակներ, դիմում պետական ու համապատասխան կառույցներին, սակայն խնդիրը մնում է չլուծված։ Այդ խնդիրների լուծման փոխարեն տարածքի աղբը շատանում է։