Երևանում կկայանա «Մենք հիշում ենք Ստալինգրադը» վավերագրական ֆիլմի պրեմիերան (տեսանյութ)

Սույն թվականի փետրվարի 23-ին՝ ժամը 12:00-ին, Երևանի «Մոսկվա» կինոթատրոնում տեղի է ունենալու Ստալինգրադի ճակատամարտի 75-ամյակին նվիրված «Մենք հիշում ենք Ստալինգրադը» վավերագրական ֆիլմի անդրանիկ ցուցադրությունը։ «Հայ-ռուսական Երիտասարդական Միասնություն» ՀԿ-ի տարածած հայտարարության մեջ:

Ֆիլմի պրեմիերային ներկա են լինելու բարձրաստիճան պաշտոնյաներ Ստալինգարդի ճակատամարտին մասնակցած 7 վետերան, ՀՀ-ում ՌԴ արտակարգ և լիազոր դեսպան Իվան Վոլինկինը, ՀՀ-ում Բելառուսի Հանրապետության արտակարգ և լիազոր դեսպան Իգոր Նազարուկը, Ազգային ժողովի պատգամավորներ, ՀՀ Վետերանների Միավորման ղեկավար կազմը, աշակերտներ, ուսանողներ, ինչպես նաև ՀՀ ՊՆ կից գործող հայրենասիրական հասարակական կազմակերպություններ, ԲՈւՀ-երի ներկայացուցիչներ և այլք։

Ֆիլմը ստեղծվել է Հայաստանում արդեն 16 տարի գործող «Հայ-ռուսական Երիտասարդական Միասնություն» (ՀՌԵՄ) հասարակական կազմակերպության կողմից, որը հանդիսանում է հայ-ռուսական երիտասարդության առաջին պաշտոնական գրանցում ունեցող միավորումը:

Միջոցառման գործընկերներն են ՀՀ պաշտպանության նախարարությունը, Երևանում ՌԴ Գիտության և մշակույթի կենտրոնը, Հայ-Ռուսական համալսարանը, «Մոսկվա» կինոթատրոնը, «Ռուսաստանում Ջավախքի սփյուռք» ՀԿ-ն, ՀՀ-ում Ռուսաստանի Դաշնության դեսպանատունը, «Ռուսաստանի հայերի միություն» հասարակական կազմակերպության մոսկովյան մասնաճյուղը, Հայաստանի երիտասարդական հիմնադրամը, «Յուպիտեր ֆոտո էքսպրես» ՍՊԸ-ն և Մոսկվայի հայրենակցի տունը:

Ֆիլմի պրեմիերային ընդառաջ «Անդրադարձ» մամուլի ակումբը հյուրընկալել էր «Հայ-ռուսական միասնություն» ՀԿ նախագահ Գոհար Ղումաշյանին և «Հայ-ռուսական միասնություն» ՀԿ փոխնախագահ, քաղաքական գիտությունների թեկնածու Սերգեյ Վարդազարյանին: