Դա առնվազն խուժանություն էր դատարանի կողմից. «Նորաշեն 2007»-ից տուժած բնակիչներ (տեսանյութ)
«Նորաշեն 2007» սպառողական կոոպերատիվի գործունեությունից տուժած բնակիչները չեն պատրաստվում դադարեցնել իրենց բողոքի ակցիաները։ Ասում են՝ գալու են այնքան ժամանակ, մինչև իրենց բնակարանների վերադարձման խնդրին լուծում տրվի։
Նրանք իրենց հետ բերել էին նաև Հերմինե Նաղդալյանի ծաղրանկարով պաստառը։ Հիշեցնենք, որ այս պաստառների պատճառով դեռ ամիսներ առաջ կառավարության գործերի կառավարիչ և ԱԺ նախկին փոխնախագահ Հերմինե Նաղդալյանի ամուսին Դավիթ Բեգլարյանը նրանց «ապուշ» ու «էշ» էր անվանել:
Հիշեցնենք նաև, որ Երևանի Գևորգ Չաուշի փողոցում բազմաբնակարան շենք կառուցելու նպատակով «Նորաշեն 2007» սպառողական կոոպերատիվի ղեկավարությունը դեռևս 2007 թվականին գումարներ էր հավաքել շենքում բնակարան գնելու ցանկություն ունեցող անձանցից: Շատերն անգամ վճարել են բնակարանի ամբողջ գումարը:
Հայտնվելով ֆինանսական ծանր վիճակում՝ կառուցապատողներն սկսել են բնակարանները գրավադրել և տոկոսով գումարներ վերցնել: Բնակարաններից 14-ը գրավադրվել է ԱԺ փոխնախագահ Հերմինե Նաղդալյանի ու նրա ամուսնու՝ Դավիթ Բեգլարյանի, իսկ մնացածը՝ տարբեր անձանց մոտ: Մինչև այսօր բնակարանների մի մասը ամուսինները չեն վերադարձնում, իսկ բնակարանների սկզբնական գնորդները մնացել են անօթևան:
