Կլյաուզնիկ ես. «Երևան Սիթի»-ում կոպտել ու վիրավորել են փչացած ապրանքի համար բացատրություն պահանջած պրոֆեսորին. 1in.am

ԵՊՀ դասախոս, պրոֆեսոր Հրաչիկ Ոսկանյանը օրերս Փակ շուկայի «Երևան Սիթի» սուպերմարկետից իր թոռնիկների համար 2 կգ ծիրանի չիր է գնել և տուն տանելով՝ պարզել է, որ գնված ծիրանի չրի զգալի մասը թաց է, շատ փափուկ և ուտելու համար ոչ ենթակա։ «Այնպիսի տպավորություն էր, որ այդ չիրը լվացած էր ջրով։ Ամբողջությամբ թաց էր և ոչ հիգիենիկ վիճակում։ Բայց ես դա իմ թոռնիկների համար էի գնել։ Ինչպե՞ս կարելի է այդպես վարվել սննդի հետ»,- 1in.am-ի հետ զրույցում ասել է պրոֆեսորը՝ հավելելով, որ զայրացած հետ է գնացել առևտրի կենտրոն և հետաքրքրվել, թե ինչպես է այդպես պատահել։ Սուպերմարկետի աշխատակիցն էլ առանց սրտնեղելու, ներողություն խնդրելու՝ պարզապես պատասխանել է, որ այդպես պատահում է։

Պրոֆեսոր Ոսկանյանին տնօրենի մոտ չեն թողել։ Փոխարենը նրան է մոտեցել աշխատակիցներից մի աղջիկ և շատ կոպիտ տոնով վիրավորել է Ոսկանյանին, կոպտել, նրան անվանել «կլյաուզնիկ» ու առանց ներողություն խնդրելու հեռացել։ Այս վերաբերմունքը շատ է զայրացրել Հրաչիկ Ոսկանյանին և՛ որպես շարքային գնորդի, և՛ որպես պրոֆեսորի։

«Ես ապշած եմ այդ վերաբերմունքից։ Ինչպե՞ս կարելի է և՛ մեղավոր լինել, գնորդին անորակ ապրանք վաճառել, և՛ մի բան էլ կոպտելով ու վիրավորելով նրանից պահանջել, որ հեռանա։ Նրանք պետք է ներողություն խնդրեն իրենց պահվածքի համար»,-եզրափակեց պրոֆեսոր Ոսկանյանը։

Մանրամասները՝ սկզբնաղբյուր կայքում