Տարոն Մարգարյանի առանձնատները. բացառիկ կադրեր (ֆոտո, վիդեո)

Երևանի Ավան վարչական շրջանի բնակիչները գոհ են Տարոն Մարգարյանից։

NEWSPRESS.am-ի հետ հարցախույզում ոչ մի ավանցի ոչ մի բացասական բնութագիր չտվեց Տարոն Մարգարյանին, և դա նորմալ է՝ իրենց «քուչի տղան է»։

Նախ անկեղծության համար պետք է հիշել, որ ավելի քան 10 տարի առաջ, երբ Մարգարյանը նոր էր ընտրվում, այն ժամանակ Ավան համայնքի ղեկավար, շատերը մտածում էին, որ նա «շատ ջահել է, ի՞նչ կարող է անել»:

Իսկապես, Տարոն Մարգարյանն այնքան ջահել էր ու իր գործում «անգիտակից», որ չէր հասկանում, թե ինչպես է օր-օրի բարեկարգում ու գեղեցկացնում իր համայնքը՝ Ավանը։ Այդ օրերից էլ Ավանի բնակիչների մոտ ձևավորվեցին իրենց թաղամասի բնակչի նկատմամբ հաճելի հիշողություններ։ Այսօր արդեն, որպես քաղաքապետ, Տարոն Մարգարյանը սկսել է «գիտակցել», որ պաշտոնյան ամենից առաջ իր ծառն է ջրելու։ Մարդկանց օգնելու նրա հին սովորությունից ոչինչ չի մնացել․ «ջահել տղան» մեծացել է ու հասկացել, որ «եղունգ ունի՝ պետք է իր գլուխը քորի»։

Նրան ավանցիները չեն փնովում զուտ այն պատճառով, որ «քուչի տղա է» և մեկ-մեկ լավության կարգով ինչ-որ բան է անում իրենց համար։

Իրականում Տարոն Մարգարյանն այն պաշտոնյաներից է, ով, օրինակ, իր անձնական գովազդի համար քաղաքային բյուջեից կարող է ծախսել ավելի քան 40 մլն դրամ ու, ընդհանրապես, ապրել շքեղ կյանքով՝ չզիջելով միլիարդատերերին:

Իհարկե, շքեղ կյանքով ապրելն ու գեղեցիկ առանձնատուն ունենալը հանցագործություն չէ։ Հանցագործությունն այն է, որ Հայաստանում շքեղ կյանքով կարողանում են ապրել միայն իշխանավորներն ու միայն նրանք։

Ի՞նչ միջոցներով է Երևանի քաղաքապետին հաջողվել իր համար շքեղ առանձնատուն կառուցել, ամառանոց ունենալ Ջերմուկում, հողամասեր՝ Դիլիջանում, ու մի քանի թանկարժեք մեքենաների տեր դառնալ (հայտարարագրի համաձայն)։ Չխոսենք նրան պատկանող սուպերմարկետի, տաքսի ծառայության, պահածոների գործարանի ու էլի մի շարք բաների մասին, որոնց մասին չենք բարձրաձայնում։ Եվ այս ամենը նա ամենևին էլ իր հալալ քրտինքով չի վաստակել։

Չի բացառվում, որ այս գումարները նա լվացել է խոշոր ծրագրերից։ Այն ծրագրերից, որով պետք է ավելի մեծ ներդրումներ աներ, օրինակ, հենց Ավան վարչական տարածքում, քան այն փոքր բաժինն է, որ նա նետում է ավանցիների առաջ ու փորձում «լավ քուչի տղու» անուն հանել։

Հետաքրքիր է՝ կգովաբանի՞ ավանցին Մարգարյանին, երբ իմանա, որ այն շքեղ առանձնատունը, որը նա կառուցել է, կառուցել է իրենց հասանելիք փողերով։ Այն փողերով, որով պետք է կառուցվեին շենքեր, վերանորոգվեին բնակարաններ ու դպրոցներ և բարեկարգվեին բակեր ու փողոցներ։ 

Մի խոսքով՝ Տարոն Մարգարյանն իրեն հավատացող բնակիչներին է խաբում ու իր քաղաքը շենացնելու փոխարեն, նա իր տունն է շենացնում։

Տեսանյութում ու նկարներում Տարոն Մարգարյանի շքեղ առանձնատունն է․