Մանվելի որդի Կարենի քթի տակ անօրինությո՞ւն

Էջմիածնի դպրոցներն արտացոլում են քաղաքապետարանի աշխատանքը։

Ավելի կոնկրետ, այն անօրինությունը, որը տեղի է ունենում դպրոցում, կատարվում է քաղաքապետարանի թողտվությամբ և հովանու ներքո։ Սա ակնհայտ է, քանի որ Մանվելի որդի Կարենը հազիվ թե ների իր «թագավորությունում» անօրինությունը և կպատժի ամեն մի կարգազանցի՝ դիմելով անգամ ամենածայրահեղ միջոցների, ինչպես դա անում է սովորաբար։

Այնպես որ՝ սխալ է կարծել, թե, օրինակ, Էջմիածնի թիվ 2 դպրոցի տնօրեն Ալվարդ Հայրապետյանը հանդգնել է առանց Կարեն Մանվելիչի իմացության, իր դպրոցը «բարդակ» սարքել ու մարսել։

Այստեղ կամայականությունն ու բարձիթողի վիճակը հասունացել է այն աստիճան, որ 12-րդ դասարանցիները չեն գնում դպրոց։

Մամուլում շրջանառվող լուրերի համաձայն՝ այս առնչությամբ ահազանգ է ստացել նաև Կրթության և գիտության նախարարությունը և գնացել հետքով։ Բայց անհասկանալի պատճառով՝ մինչև գնալը, նախարարությունից զգուշացրել են, թե՝ տիկի՛ն տնօրեն, գալիս ենք Ձեզ մոտ ստուգումների՝ տեսնենք՝ աշակերտները դասի գալի՞ս են, թե՞ ոչ։ Դե զգուշացված ես, ուրեմն զինված ես․ աշակերտներին այդ օրը ստիպել են գալ դասի և ցույց տալ «չարախոսներին», և որ դպրոցն աշխատում է բնականոն հունով։

Նույն այդ «չարախոսների» խոսքով՝ աշակերտները 8000-ական դրամ են հավաքում՝ Մարտի ութին ընդառաջ։ Նվերի համար նախատեսված բարձր «ստավկաներն» էլ, հավանաբար, կաշառք են՝ դասերից բացակայելու դիմաց։ Թեև նման դեպքում տնօրենը հազիվ թե բավարարվեր իր համար հատկացված չափաբաժնով և գնար նման քայլի։

Ու եթե տնօրեն Հայրապետյանը համարձակվում է քաղաքապետի քթի տակ անօրինական գործունեություն ծավալել ու մարսել, նշանակում է` երկուսից մեկը՝ կա՛մ իր գործողությունները համաձայնեցրել է քաղաքագլխի հետ, կա՛մ հիմարացրել է նրան։

NEWSPRESS.am